Sorkar pisa palia thawktute tan NCD awareness campaign & screening

Lunglei District Health Society hmalakna 'Healthy Lunglei District Campaign' hnuaiah nimin khan Convention Centre-ah Lunglei Municipal Council (LMC), District Transport Office, Urban Development & Poverty Alleviation department leh Local Administration department thawktute tan natna inkai chhawn theih loh, non-communicable disease (NCD) chungchang inzirtirna leh an hriselna dinhmun enfiahna buatsaih a ni.

NCD awareness campaign & screening hi Lunglei additional DC James Miahlung-in kaihruaiin, "Mizoramah NCD natna chi hrang hrang - BP sang, zunthlum, cancer leh a dangte a hluar a, sorkar hnathawkte pawh a tibuai nas hle. He'ng natna hian ei leh in leh nunphungah harsatna a thlen bakah inenkawl nan sum tam tak sen a ngai ṭhin a, vei lo turin nun uluk leh mahni inenkawl ṭhat a pawimawh," a ti.

He hunah hian Civil Hospital Lungleia medical officer Dr Rinmuana chuan NCD awmzia, natna lanchhuah dan leh natna lo awm chhan bakah, inven dan tur hrang hrang a sawifiah a; zawhna leh chhanna hun hman niin, hun hman zawhah Health department-a thawktuten office palia thawktute hriselna dinhmun an endik a ni.