Lobo khuaah project hawn a ni

Siaha Rural Development Block chuan nimin khan Labo khuaah ‘Project Rotling-Hmasawnna Rahbi Thar’ hnuaia ‘Sustainable & Holistic Development of Agri & Allied Project’ hawnna hun an buatsaih a, Siaha DRDO project director M Misael-a'n a hmanpui.

M Misael chuan, ‘Project Rotling-Hmasawnna Rahbi Thar’ chu Mizorama RD Block 28-te inelna a nih thu a sawi a, "Short term project, medium term project leh long term project-te awmin, Mizorama RD Block 28 aṭangin concept paper 84 a lut a, chu'ng zingah short term project hnuaiah 'Common Facility Center (CFC) at Kawlchaw East Village' leh long term project hnuaiah 'Sustainable and Holistic Development of Agriculture & Allied at Lobo (Lungbun) Village'-te thlan a ni hi a ropui takzet," a ti a; project a hlawhtlin theih nana khawtlang hruaitute leh mipui thawhhonaah lawmthu a sawi.

He huna tarlan danin, Siaha RD Block hian RD Secretariat aṭanga February 14, 2024-a project Rotling proposal siam tura lehkha an hmuh bawkzuiin project pathum an thehlut a, stage hrang hranga endik a nih hnuah project pahnih hi thlan a ni. Sustainable and Holistic development of Agri & Allied at Lobo Project'-in a tum ber chu chhung tinte tan eizawnna ngelnghet siam a, intodelhtir tum a ni.