Congress Party kan tho kang leh ang - MPCC Treasurer

MPCC treasurer Dr Lalmalsawma Nghaka chuan nimin khan Sinlung Hills Council (SHC) inthlan lo awm tur atana campaign-in Ratu a tlawh a, Congress Party an thawh kan leh tur thu a sawi.

Dr Lalmalsawma chuan mupuiin a thlate tuai tharin van sanga a thlawk leh ṭhin angin Congress Party-in hma thar an la dawn tih sawiin, "Kan tho kang leh ang. Congress Party hian mipui mamawh leh mipuite milin kan in siamthar leh ṭhin a, kan hmathlirte mipui mamawh milin kan her rem ṭhin a ni. Tluk sawp chang nei thin mah ila, Pathian khawngaihna a zarah mupui sang taka a thlawk kang leh thin angin kan tho kang ve leh ṭhin," a ti.

Tunhnai inthlan lo awm tawhahte an che ṭha lo hle tih sawiin MPCC Treasurer chuan, "Mah se, chung kan chak lohnate chu inzir nan leh chona thar min petu a ni tih hriain, ram mipuite chhenfakawm ssorkar a din leh theih nan, nasa takin hmathlir thar leh mipuite mamawh zir chiang chungin new age Congress a lo tho kang leh ṭhin angin tho leh turin kan inbuatsaih mek," a ti a, Congress danglamna hi sawi tam ve tawh turin mipuite a sawm.

MPCC Treasurer chuan SHC inthlan lo awm tura Congress candidate-te chu an hotuten uluk taka ngaihtuahna an sen hnua an bial ṭheuh mipuite tana nasa taka hnathawk thei tur leh mahni inhaivur tum lova mipuite rawngbawl saka inpumpek tura rinte candidate-ah chhawpchhuah an nih thu sawiin, "Thlan tlin an nih chuan Congress hi party dang pahnih hotuten thu an sut leh zung zung ang kan ni ve lo a, kan intiamnate kan tihlawhtling ṭhin," a ti.