ZPM hi a nghet tak tak thei lo - MNF Sr. Vice President

MNF sr. vice presi-dent Dr R Lalthangliana chuan nimin khan Sinlung Hills Council inthlan lo awm tur atana campaign-in Sailutar, Sawleng, New Vervek, Sakawrdai, Tinghmun, Zohmun, Lungsum leh Ratu khuate a tlawh a, ZPM chu an nghet tak tak thei lo niin a sawi.

Dr R Lalthangliana chuan ZPM chu pawl 5/6 vel inthlungkhawm an nih thu sawiin, "Tun sorkar ang hi Mizoramah a la piang ngai lo a, Congress leh MNF chu party malin kan sorkar ṭhin a, party kan nghet hle. ZPM hi chu an nghet ve thei tak tak lo. 'Min enchhin rawh u' an tih avangin mipuiin ZPM kha enchhin an chak a, kan han enchhin ta a, thla 10 an sorkar chhung hian mipui rin ang an ni lo hle. Min enchhin rawh u titute hian enchhin an dawl lo ṭan hle a, rei an kal hi a rinawm loh a ni," a ti.

MNF Sr. Vice President sawi danin, ration card vara laten a let thawka man toin an la a, AMC area-ah chauh a man toa la turin an insawi. Mahse, thingtlangah pawh a man to vekin an la leh si, tuialhthei man a to a, kawng a chhe em em a, sorkar hnathawk chungah an inluling hle a, mipui beng a thlep ṭan.