Kuminah ASF vanga vawk thi 14,092; ASF vanga vawk thi-ah Rs 4,000 zel pek theih

Vawk pùl hri, African Swine Fever (ASF) vanga vawk thite chu Mizoram sorkarin State Specific Disaster-ah a puan avangin kumina ASF vanga vawk thi neitute hnenah vawk pakhatah chhawmdawlna Rs 4,000 zel pek theih a ni tawh dawn a; kuminah January 1 aṭanga nimin thleng khan ASF avanga vawk thi 14,092 a awm tawh.

Sorkar thuchhuah tarlan danin, State Disaster Management Authority pawmpuinain ASF chu kum 2024 chhung atan leh Mizoram huamchhung atan State Specific Disaster-ah puan a ni a, State Executive Committee thutlukna angin State Specific Disaster avanga chhiatna tawkte chhawmdawlna chu Disaster Management Act, 2005, Section a8(1)(a) hnuaia siam State Disaster Response Fund (SDRF) aṭangin pek tur a ni. SDRF leh India sorkar hnuaia Ministry of Home Affairs-in kum 2022-23 aṭanga 2025-26 inkar atana National Disaster Response Fund (NDRF) hmanga chhiatna tawkte chhawmdawl dan tur kalphung a duan chu he chhiatna thleng atan hian kum 2024 chhungin hman tur a ni.

ASF hri leng avanga vawk hlohtute chhawmdawlna chu SDRF kalphung angin vawk pakhat zelah Rs 4,000 zel pek theih a ni a, kumin chhunga ASF vanga harsatna (State Specific Disaster of ASF for 2024) bik atan erawh hi chuan vawk thi chu eng zat pawh ni se, chhawmdawlna hi chhungkaw khat tan vawk paruk chin bak pek theih a nih dawn loh thu tarlangin Mizoram sorkar chuan, "ASF vanga vawk thi chhawmdawlna hi mahni awmna district ṭheuha Animal Husbandry & Veterinary department hnuaia District Veterinary Officer (DVO) hnenah dil tur a ni a, DVO hian ASF vanga thi ngei a ni tih fiahna lehkha (certificate) a siam ang. DVO-in certificate a siam tel lo chuan dilna hi pawm theih a ni lo," a ti.

Chhawmdawlna dilna chu vawk thih ni aṭanga ni 30 emaw, he thuchhuah ni (October 14, 2024) aṭanga ni 30 emaw chhungin thehluh hman tur a ni a; ASF vanga vawk thi ṭanpuina dawng tawhte a huam loh bakah, hri leng venna tura vawk suat a huam lo. Vawk suat avanga vawk chante chhawmdawlna chu a hranpa in sorkar laipuiah Mizoram sorkar chuan kum 2021 aṭang khan zangnadawmna a dilsak ṭhin a ni.

AH&Vety department-in a chhinchhiah danin, kuminah January 1 aṭanga nimin thleng khan Mizoram district 11-a khua/veng 250-ah ASF vanga vawk 14,092 leh ASF hri darh zel tur ven nana vawk suat 23,530 a awm tawh a; kumin chhunga ASF vanga vawk thi tam berna Thenzawl khuaah chuan vawk 1,059 a thi tawh a ni.