AMC term pawhsei a ni lo: Administrator atan AMC commissioner ni lai K Laldingliana ruat

AMC kal zel dan tur hi nimin khan Chief Secretary conference hall-ah AMC nodal department UDPA changtu deputy chief minister Tawnluia'n thuthar thehdarhtute kâwmin a sawifiah a; UDPA secretary Dr C Vanlalramsanga leh director H Lianzela ten an ṭawiawm.

Dy. Chief Minister chuan, AMC term chu December 9 zanlai dar 12-ah a tàwp dawn tih sawiin, "Term a tàwp dawn takah chuan kal zel dan tur ngaihtuahna a awm. Mizoram Municipalities Act, 2007-ah harsatna dang a awm loh chuan term ding lai zawh hmain inthlan tur tih a ni," a ti.

Tawnluia sawi danin, Covid-19 vangin village council leh local council inthlan a hunah tih theih a ni lo a, ṭum hnih term pawhsei a ni. Inthlan hun August 28, 2020-ah pawh Covid-19 vangin hmun ṭhenkhatah chuan inthlan theih a ni lo. AMC inthlan pawh a hunah SEC-in an buatsaih thei dawn lo a ni.

SEC aṭangin inthlan buatsaih a nih dawn rih loh thu UDPA-in an dawng tih sawiin Tawnluia chuan, "Kan hma lawkah Krismas a thleng dawn a, hunpui him zawka hman a nih theihna atan inthlanpui neih rih loh hi mithiamte pawhin ṭha an ti a ni," a ti.

Dy. Chief Minister chuan, India rama Municipalities Act hrang hrang an zir thu sawiin, "Chung hoah pawh chuan muni­cipal corporation pawhseina dan a awm lo. Chuvangin, The Mizoram Municipalities Act, 2007-in thuneihna a pek angin administrator ruat a ni," a ti a, administrator chuan inthlan buatsaih a nih hma zawng AMC a enkawl tur thu a sawi.

UDPA department chuan nimin khan notification tichhuakin, AMC administrator atana AMC commissioner K Laldingliana ruat a nih thu hi an tarlang.

UDPA tarlan danin, The Mizoram Municipalities Act, 2007-ah chuan, 'Municipality-ah eng vang pawha a hun taka in­thlan theih loh a nih chuan municipality chu ṭhiah tur a ni. State sorkarin administrator ruatin, municipal authorities mawh­­phurhna leh thuneihna zawng zawng, inthlan theih a nih hma chuan a kengkawh ang,' tih a ni.