COVID-19: Mizoram dinhmun Hripui vei enkawl mek mi 174
December 6, Pathianni khan Mizoramah Covid-19 vei mi pahnih hmuh chhuah belh a ni a; nimin khan hripui laka fihlim tawh mi 28 chhuahtir thung niin, hripui vei vanga enkawl mek mi 174 an awm.
Covid-19 vei hmuh chhuah thar pahnih chu Rapid Antigen Test (RAT) hmanga Serchhip district-a hmuh chhuah an ni a; ZMC laboratory-ah swab sample endik a ni lo a, Siaha leh Saitualah TrueNAT-PCR hmangin sample 14 endik ni mah se, hripui vei an awm lo.
Hripui vei hmuh tharte chu mipa kum 34 leh 45 mi, Police Training School, Thenzawla awm ve ve an ni a, hri an kaina hriat a ni lo. An pahnih hian November thlaa Bihar Assembly inthlana duty-te zinga mi niin, an rawn haw hnua quarantine facility-a an awm laiin TrueNAT-PCR leh RAT hmanga endiknaah negative tawh ve ve an ni a; Covid-19 symptom an neih vanga endik nawn leh an ni.
Nimin khan hripui laka fihlîm tawh mi 28 chhuahtir an ni a; Aizawl district leh Lunglei district-ah mi panga ve ve, Serchhip district-ah mi pali, Lawngtlai district-ah mi 13 leh Mamit district-ah mi pakhat an chhuak.
Mizoramah Covid-19 positive mi 3,936 hmuh chhuah a ni tawh a, mipa 2,902 leh hmeichhia 1,034 an ni. Nimin tlai dar 5 thleng khan mi 3,756 (95.43%) chhuahtir an ni tawh a, mi paruk (0.15%) thi tawhin, enkawl mek mi 174 (4.42%) an awm.
Mizorama Covid-19 positive hmuh chhuah tawh mi 3,936 zinga mi 1,850 chu Mizoram chhunga kái an ni a, mi 2,086 chu state páwn aṭanga rawn lût an ni.