Covid-19 vanga harsatna tâwk tan Central aṭangin vbc. 24 hmuh a ni
Mizoram sorkar chuan Covid-19 vanga harsatna tâwkte puihna turin sorkar laipui aṭangin special assistance hnuaiah cheng vbc. 21.83 leh North Eastern Council (NEC) aṭangin cheng vbc. 3 a hmu tawh.
Vanglaini palai zawhna chhangin Planning secretary Dr C Vanlalramsanga chuan, Covid-19 vanga harsatna awmte sutkian a nih theihna atan theihtawp an chhuah niin a sawi a, "Project siamin central lamah kan thehlut ṭhin. Central aṭangin special assistance kan hmuh hi a hmanna tur chi hrang hranga ruahman a ni," a ti.
Dr C Vanlalramsanga sawi danin, cheng vbc. 21.83 chu loan la, Covid-19 vanga rûl ṭha thei lo puihna atan te, loneitute tana tui lâkna ṭha zawk siamna atan te, ṭanpui ngaite pawisa faia ṭanpuina atan leh thil dang atan hman tura ruahman a ni.
Planning Secretary chuan, NEC nen ṭang dunin state páwna eizawng, Covid-19 vanga hna chhunzawm thei lo (return migrant)-te tan cheng nuai 300 ruahman a nih thu sawiin, "Anni hi training kawng hrang hranga pein, industry lama hna an thawh chhunzawm theih dan tur ngaihtuahpui a ni ang," a ti a; return migrant-te tan cheng nuai 300 hù project an siam leh mek thu a sawi.