Sumdawnna lirtheite nawrh an tum avangin sorkarin ruahmanna a siam - Home Minister

Chief Minister mawhphurhna la mektu Home minister K Sapdanga chuan, Mizoram Commercial Vehicle Union (MCVU)-in lungawi lohna lantira an lirtheite dintir an tum avangin, mipui nunphung a khaihlak lohna atan sorkarin ruahmanna a siam thu a sawi.

Home Minister hian nimina a pisaa amah kâwmtu thuthar thehdarhtute zawhna chhangin, "MCVU-te'n tlan loa nawrh an puan hi sût leh turin ka ngen nawn a ni. An nuar lui a nih pawhin, transport association dang thlâwp tum lo an pung zel. Vawiin hian ka hoin Transport deptartment hotute leh Police department hotute kan ṭhukhawm a, MCVU hian nawrh hi an ṭhulh lo a nih pawhin mipui nunphung a kaihlak lohna turin ruahmanna chi hrang hrang kan siam," a ti.

K Sapdanga chuan, diesel leh petrol aṭanga chhiah lak tharte chu hnathawhna atana hman vek tur a nih thu sawi nawnin, chhiah tling khawm hmasate chu Aizawl leh Kolasib inkar kawngpui chhe lutuk siamṭhat hna thawh nan hman nghal mawlh mawlh tum a nih thu a sawi.

Home Minister chuan, sumdawnna lirtheite chu Mizoram sorkarin State Transport Authority (STA) hmanga public service phalna plying permit a pekte an nih thu sawiin, plying permit an dilnaa STA thupek zâwm tura an intiamna ennawn leh turin a chah a; hming an ziah hnan an intiamna anga awm thei lote hnena permit kawltir reng chu a remchang zui kher loh tur thu a sawi bawk.