Rûl chi hmu chhuak thar
Mizoram University-a Department of Zoology-a head of department (HoD) Prof. HT Lalremsanga leh a research scholar Virender Kumar chuan Mumbai, Germany leh United Kingdom-a an thawhpuite nen Himalaya tlangram, Himachal Pradesh-a Chura Valley leh Shimla aṭangin rûl chi (species) thar, genus thar ni bawk an hmu chhuak.
Thu dawn danin, Prof. HT Lalremsanga leh a thawhpuite'n rûl chi an hmuh chhuah thar hi lemchan thiam (hollywood actor), environment humhalh leh global climate change-a thawh hlawk Leonardo Dicaprio hmingchawiin 'Anguiculus dicaprioi' tih hming phuah a ni a; an zirchianna hi nature publishing group scientific journal Scientific Reports (2024) 14: 24743 chuan October 21, 2024 khan a chhuah (publish) a ni.
Prof. HT Lalremsanga chuan, "Kan rûl hmuh chhuah hi a pianphung, DNA leh CT-scan chi ruk hmanga a lu ruh zirchianna aṭangin a laichìn hnai ber Rhadinophis nen an danglam nasat êm avangin species thar ni mai loin, genus thar a ni tih finfiah a ni," a ti a; Anguiculus dicaprioi chu a common name-ah 'Dicaprio's Himalayan snake' tia an phuah bawk thu a sawi.