Buhtun chawikanna hun hmang

North Eastern Regional Agriculture Marketing Corpo-ration (NERAMAC) leh sorkar laipuia Ministry of Agriculture & Farmers Welfare chuan nimin khan Aijal Club-ah India rama buhtun chawikanna, 'Promotion of millets in India' an buatsaih a; Agriculture & Farmers Welfare minister PC Vanlalruata'n a hmanpui.

PC Vanlalruata chuan, tun hmain Mizoramah loa buh karah buhtun chìn ṭhin a nih thu sawiin, buhtun chìn uar tura NERAMAC hmalakna chu lawmawm a tih thu a sawi a; buhtun chu Mizote'n hriselna lamah hma an sawnpui ngei a rin thu leh zunthlum neite'n an hlâwkpui a beisei thu a sawi bawk.

Agriculture & Farmers Welfare director Ramdinliani, NERAMAC commodore Rajiv Ashok leh NABARD general manager Pankaja Borah ten buhtun chungchanga thil pawimawhte an sawi a; buhtun lama hma la duhte tan India sorkar a inhawn hle thu an sawi.

Promotion of Millets in India pual hian buhtun aṭanga siam ei tur chi hrang hrang phochhuahna stall 12 buatsaih a ni a, Agriculture Mnister-in a hawng. Vawiinah chhunzawma zawh tur a ni a, stall-te chu mipui tan chawhnu dar 2 thleng hawn a ni.

Promotion of Millets in India hunah hian khaw hrang hrang aṭangin farmer producer organisation-te leh thuthar thehdarhtute an tel.