Khaw ṭhenkhatah haw hun bithliah Covid-19 free certificate phût an awm

Krismas a hnai a, Aizawla cheng mi eng emaw zat chu an khaw lama haw turin an inbuatsaih mek. Hetih lai hian, khaw eng emaw zatah chuan an khaw mite haw hun tur an bithliah a, Covid-19 lakah an fihlîm a ni tih fin­fiah­na lehkha phûtte pawh an awm.

Aizawl aṭanga mahni khaw lama haw turte tana kaihhruaina leh khuahkhirhna siam chungchangah hian Vanglaini palai chuan khaw ṭhenkhata khawtlang hruaitute a bia a; haw hun turah ni bithliah siam an awm laiin, siam lo an awm nual. Vanglaini palaiin a biak zingah Krismas leh kumthar lawm tum an awm lo.

Khawtlangin an himna tura ruahmanna an siamte sorkar lamin a ṭhiah ṭhin vanga lungawi lo deuhte pawh an awm a; Sialhâwk YMA hruaitute chuan, an himna tura an ruahmannate DC lamin an ṭhiah zel avangin an lungawi lo lek lek tawh tih an sawi.

Saitual district-a Phûllèn khua chuan Aizawl aṭanga an khuaa haw turte chu December 15 aia tlai loa haw turin an ngen. Phullèn Village Task Force (VTF) Chairman chuan, "December 15 aia tlai loah haw turin inngen mah ila, hna leh pawimawh bik vanga loh theih loha ni 15 hnu lama haw ngaite pawh haw theih tho a ni a, mahse, VTF hriattir hmasak ni se kan ti. Hei hi a nazawnga zin tur vênna tur a ni pakhat," a ti. Tun hnaiah hripuiin an khua a chènchilh ve a, nasa takin VTF an buai phah thu leh chutiang chu a thlen tawh loh nan leh invèn nan rua­hmanna an siam thu a sawi.

NE Tlangnuam khuaah chuan December 12 thleng zalên taka hàwna hun an siam a, chu chu Aizawla tih tur pawimawh bik nei tawh chuang lote tan a ni deuh bik. YMA hruaitu pakhat chuan, "Hna thawhna emaw vanga loh thei loha ni 12 hmaa haw thei lote pawh an awm thoin kan ring. Rawn hawte chu fimkhur taka awm a, léng chhuak tam lo turin kan inhriattir. Khaw dáiah kan duty ṭhin," a ti.

Sesawng khuaah VC pahnih an awm a, an tih dan a inang lo hret. Sesawng Branch YMA Secretary aṭanga thu dawn danin, Sesawng VC-I lam chuan an khuaa haw turte December 6 aia tlai loah VTF hnena inhriattir turin an ti a, haw hun turah erawh bithliah an siam lo. Haw tura inhriattir mi 100 chuang an awm tih sawiin, "Inhriattir hmasa si loa hawte chu sorkar dan angin action lâk kan tum. Kan khuaah Krismas kan hmang dawn lo a, ṭhian hoa thil tih khawm leh picnic ang chi pawh kan phal lo," an ti a; sorkar kaihhruaina ang zela an kal thu an sawi.

Hetih lai hian, Sesawng VC-II lam chuan an huam chhunga mi, Aizawl aṭanga haw turte chu December 15 hmaa haw vek turin an hriattir a ni.

Rabung Branch YMA hruaitute'n Vanglaini an hrilh danin, a tìrah chuan December 12 hmain Aizawl aṭang haw turte chu haw vek turin kan inngen a, ngei ngei thil erawh a ni lo. Hawte pawh chawlhkar khat chhung home quarantine turin an ti a ni.

Rabung VTF hruaitute December 6, Pathiannia ṭhukhawmin thutlukna dang an siam a; Aizawl lam boruak a ziaawm tâk rih avangin haw hun bithliah an siam tawh lo a, duh hun hunah zalên taka haw theih a ni. Home quarantine tur tih pawh an ṭhiat a; mahse, fimkhur taka awm tur leh léng chhuak tam lo turin an inchah.

Leithûm YMA office bearer-te zinga mi H Lalhmingliana chuan, harsatna bik nei lote chu December 13 ral hmaa haw turin an inhriattir tih a sawi a, "Harsatna bik neite erawh chu VTF-ah inhriattir tur a ni a, ni 13 hnu lama hawte chu home quarantine an inhuam a ngai," tiin Vanglaini a hrilh.

Mamit district-a West Phaileng VTF chuan an khuaa haw tur leh zin turte lakah hripui an vei lo tih tihchianna lehkha an phut a, haw hun tur bithliah erawh an nei lo. YMA hruaitute chuan, "Covid-19 free certificate an nei ngei tur a ni, kan ti a; hei hi kan khaw mi rawn haw turte bakah, rawn zin turte tan pawh a ni," an ti. Hemi chungchang hi December 6, Pathianni khan an rél a, nimin khan hman ṭan nghal a ni.

Hnahthial district-a Pángzawl khua chuan Aizawl aṭanga an khuaa haw turte chu December 15 ral hmaa haw vek turin an hriattir. YMA hruaitute chuan, an khuaa haw turte chu VTF-ah inhriattir hmasa turin an tih bakah, Aizawl aṭanga hawte chu YMA hruaitute kaihhruaina hnuaiah ni sarih chhung inkhung tura an tih thu an sawi. Covid-19 free certificate neite tan inkhung a ngai lo thung.

Champhai district-a Sialhâwk khua chuan tun dinhmunah Aizawl aṭanga an khaw mi haw turte haw hun turah ni bithliah an siam lo a, zanin (Thawhlehni zan) hian VTF hruaitute an ṭhukhawm dawn a, an sawiho rin a ni.

Sialhawk YMA president Lalzarzova Colney chuan, Covid-19 chungchangah a hma aṭangin theihtawpin an fimkhur a, kalphungte pawh an siam tih sawiin, "A hma chuan an awmna task force lehkha, quarantine lai an ni lo tih tihchiannate pawh kan phût ṭhin a, tunah chuan kan phût tawh lo," a ti.

An khaw himna tura dan an siamte chu DC-in a ṭhiahsak zel tih sawiin Sialhawk YMA President chuan, "Tunah chuan VTF hian tih theih vak kan nei lo. Kan himna tura kan ruahmannate DC lamin min ṭhiahsak zel avangin kan lungawi lo lek lek tawh a ni," a ti a; East Lungdar khua pawhin ni 15 hmaa haw vek turin an inti a, mahse, chu pawh chu DC-in a ṭhiahsak leh tho nia an hriat thu a sawi.

Khawbung khawtlang chuan an khaw mite haw dan turah ruahman an nei lo a, an duh hun huna haw an phal. YMA hruaitute chuan, a tìr lamah chuan inhung ve viau mah se, sorkar lam thu avangin an ti hlei thei lo tih sawiin, "Sorkar official duty-te an rawn lut ve fo a, anni pawh kan dang thei lo a, anni kan dan theih loh laia kan khaw mite laka lo khauh viau leh lo dan bik thu a awm lo," an ti.

Khawzawl district-a Chawngtlaiah chuan Aizawl aṭanga haw dan tur leh haw hun turah hun bithliah an siam lo. YMA hruaitute chuan, "Maxicab pawh a service reng a, rawn haw turte Covid-19 negative certificate pawh kan phût lo," an ti a; swab sample test theite chu test turin an ngen a, tih ngei tur erawh a ni lo tih an sawi.

Lunglei district-a Thingfál VTF pawhin Aizawl aṭanga haw turte chungchangah ruahmanna an siam lo a, hun bithliah an nei lo. YMA hruaitute chuan, "A hma aṭangin rawn haw turte chu quarantine lai an ni lo tih tihchianna lehkha kan lo phût ve ṭhin a, phai aṭanga rawn hawte chu Covid-19 negative certificate pawh kan lo phût ṭhin," an ti.

Hnahthial district-a Dárzo VTF chuan Aizawl aṭanga hawte tan ruahmanna an la siam lo a, zanin (Thawhlehni zan) hian an ṭhukhawm dawn a ni. Mamit district-a Kawrtethawveng VTF pawhin ruahmanna an siam lo bawk.