Income Tax chêt dan Mizo hmuhsitnaah ngai

Mizoram Merchant Association (MIMA) chuan, Mizo sumdawngte chunga Income Tax chêt dan chu Mizo hnam hmuhsitnaah an ngai a, tun ang zela Income Tax an chet chuan law court-ah thlen an tum thu an tarlang.

MIMA chuan thuchhuah siamin, Mizoram chu income tax âwl (exempt) a ni chungin Income Tax-in online hmanga hriattirna pein, tribal certificate, income tax exemption cerfiticate leh income tax exempt an nihna dan (section) tarlang turtea tih an nih ṭhin thu leh, an thiam anga assessment siama chhanna (income tax return) an pek hnuah pawh hriattirna pek nawn an nih ṭhin thu an tarlang a ni.

Income Tax thil tih dan avangin mi tam tak an mangang tih sawiin MIMA chuan, "Chartered accountant-te ruaiin cheng sing tél, nuai télte an séng a, hei hi Mizo hnam hmuhsitnaah ngaiin kan ngaithiam lo tak zet. Hetiang a nih avang hian Income Tax hotute lehkha thawn a, chumi hnua hetiang a thleng leh zel a nih chuan law court thlenga kal ni se," an ti.