PE dept.-in ngaihdam dil turin AR phût

Power & Electricity department-a thawktute chuan, an department enkawltu minister F Rodingliana laka an chet dan avangin Assam Rifles-te chu ngaihdam dil tura an phût bakah, dan anga action la turin sorkar laipui an phût.

PE department-a thawkte chuan thuchhuah siamin, PE Minister chunga AR sipaite chêt dan an dem thu an tarlang a; Assam Rifles-te chet dan chu minister leh Mizoram mipui zah lohnaah an ngaih thu leh tun hnuah thleng nawn tawh lo se an duh thu an tarlang a ni.

"Kan Minister zahawm tak chunga thil thleng duhawm lo avang hian Assam Rifles hotute'n Mizoram sorkar leh kan Minister zahawm tak hnenah ziakin ngaihdam dilna thlen ngei turin AR-te hi keini PE officer leh staff-te chuan kan phût tlat. Hetiang thil duhawm lo thlentirtu AR official-te chungah dan angin Ministry of Home Affairs, Govt. of India chu action la zui nghal ngei turin kan phût tlat bawk," an ti.

PE officer leh staff-te chuan, "Assam Rifles-te'n kan Minister zahawm tak chunga thil duhawm lo an thlentir chungchangah hian kan Minister zahawm tak thlavâng kan hauh tlat zel dawn a ni," an ti bawk.