KHAWTHLIR

MNYF-in thisen pe

Mizo National Youth Front chuan nimin khan Mizo Hnam Runah thisen pek an huaihawt a, Civil Hospital, Aizawl tan thisen unit 51 an pe a, petute mipa 43 leh hmeichhia pariat an ni. Police Training School, Thenzawla awmte pawhin nimin khan Serchhip District Hospital tan thisen unit 10 an pe bawk.

Mei zu man

Aizawl District Anti Tobacco Squad chuan October 21, Thawhṭanni khan Tuikhuahtlang huam chhunga pisa hrang hrangah phal lohna hmuna mei zu an awm leh awm loh an enfiah a, dan bawhchhia mi pahnih manin, pawisa an chawitir.

Kawng ngaimawh

Mizoram Merchant Association (MIMA) chuan thuchhuah siamin, New Market building chhak lama mipui kalna zím lutuk, inpelh pawh harsa khawpa hun rei tak a awm tawh chu ṭha lo an ti a, mipui zah lohna nia an hriat thu an tarlang. Kawng chu October 2024 chhunga hawng zau turin a mawhphurtute an ngen a, "Hawn zauh a nih loh chuan MIMA kaihhruainain sumdawngte'n a hawn dan tur an ngaihtuah ang," an ti.

Heroin man

CID (Crime) hnuaia Special Narcotic Police Station mite leh Assam Rifles sipaite chuan October 21, Thawhṭanni khan Chhinga Veng, Aizawlah heroin no. 4 gram 28.55 an man a, a neitu Lalchhandami (39) w/o Remnalalliana, Chhinga Veng an man bawk.

Tobacco campaign

Mamit High School-ah nimin khan 'Tobacco Free Youth Campaign' buatsaih a ni a, additional DC Carolyn LB Khiangte-in a hawng. Campaign-ah hian National Tobacco Control Programme district consultant Dr Nancy Lalnunmawii'n vaihlo leh ruih theih thil ṭhat lohna hrang hrang a sawifiah a; kalkhawmte'n vaihlo laka fihlim tura intiamna thu an sawi rual a ni.

Sangha khawi

Khawzawl District Development Office chuan nimin khan Khawzawl DC pisa auditorium-ah sangha khawitute tan training an buatsaih a, bawrhsap K Vanlalṭhiana'n a hmanpui. Khawzawl district fisheries development officer Zohmingthanga'n sangha khawitute hnenah sangha enkawl dan a zirtir a ni.

Phalna neih ngai

Serchhip bawrhsap Paul L Khuma chuan thuchhuah siamin, "Construction & Demolition Waste Management Rules, 2016-in a sawi angin Serchhip district-a leivûng leh in sakna bungraw chhia paih tur neite chuan mumal taka an bungraw chhiate an paih hi an tihmakmawh a ni a, paih tur neite'n DC hnenah paih phalna an lak hma chu khawiah mah paih phal a ni lo," a ti.

Career guidance

Lunglei District Legal Services Authority, Lunglei Officers' Club leh IQAC, HATIM-te chuan nimin khan Higher and Technical Institute, Mizoram (HATIM) multipurpose hall-ah dan lam zirhona leh zirlaite an hma lam hun atana kaihhruaina leh kawng kawhhmuhna, 'Legal awareness cum career guidance programme' an buatsaih a; mithiamte'n thil pawimawhte an sawifiah bakah, zawhna leh chhana hun hman a ni.