Tiam chin awm loa din tum sumdawnna lirtheite ni khat chauh an nuar dawn; Lirthei pawl 13-in nawrh an thlâwp lo

Mizoram Commercial Vehicle Union (MCVU) chuan vawiin October 23, Nilaini aṭangin tiam chin awm loha nawrh tum mah se, ni khat - vawiin October 23-ah chauh nawrh an huaihawt dawn. MCVU-in nawrh huaihawt an tum hi sumdawnna lirthei pawl 13 chuan an thlàwp dawn loh thu an puang thung.

MCVU hian Mizoram sorkarin chhiah lak a tihpun avanga tuialhthei man sang leh kawng chhia avanga tiam chin awm loa lungawi lohna lantir an tum thu an lo puang tawh a; mahse, ni khat (darkar 12) chhung chauh kalpui turin an ti leh ta zawk. Ruahman dan chuan, vawiin hian zing dar 6 aṭanga zan dar 6 thleng nawrh thláwptu sumdawnna lirtheite an tlan dawn lo a ni.

MCVU hruaitute chuan nimin khan Aizawl Press Club-ah thuthar thehdarhtute kâwmin, lungawi lohna lantir an tum chhan an sawifiah a; tuialhthei man tihtoin lirtheia eizawngte ringawt a nghawng lo nia sawiin, "Chhung tin min nghawng. Tuialhthei man a san chuan bungraw phurh man a to lo thei lo a, in sakna bungrua leh ei leh bar phurh man a sang dawn. Hemi ngaihtuah chunga lungawi lohna lantir kan ni tih min hriatpui a, min thláwp turin mipui kan ngen a ni," an ti.

Tun hnaiah YMA Rorel Inkhawm leh kohhran inkhawmpui a awm dawn avangin tiam chin awm loa lungawi lohna lantir an tum chu ni khat chauh kalpui tura an tih leh tâk thu sawiin MCVU hruaitute chuan, "Lungawi lohna lantir a ngai hi a pawi kan ti hle. Kan hamṭhatna ringawt ngaihtuah ila, sorkarin tuialhthei man a tihpun rual khan lirthei chuan man leh thil phurh man kan tisang nghal ang," an ti a, mipui tawrhna thleng lo se an duh avanga lungawi lohna lantir tur niin an insawi.

MCVU hruaitute chuan, kawng chhiat thu chu mi tin hriat a nih thu sawiin, "Mizoram pumah inkalpawhna kawng a chhe em em vek a, Aizawl khaw chhung pawh a chhiat ber ṭum tih hial a ni. Phai aṭanga kan châk lakna kawngpui tlân hleih theih loh khawpin a chhia. Kan lirtheiin a tuar a, a tuartu ber chu mipui an ni. Ruahtui tlak tam vang chu ni pakhat mah se, sorkar inthlahdah vang niin kan hria a, kan lungawi lo a ni," an ti.

Chhiah lâk leh tuialhthei man tihpun chu an do lo nia sawiin MCVU hruaitute chuan, "Vawi leh khata a pung vak mai hi kan hrethiam lo. Thil man zawng zawng a tito tur leh mipuia a nghawng turte thlirin Chief Minister pawh vawi thum kan hmu," an ti a; NGOCC-in diesel leh petrol man hi Rs. 3 ve vea dil hniam theih an inrin avang leh an thu leh hla ngaichâng tura an ngen avangin an hun tiam tawlh zawk an nih thu an sawi.

MCVU hruaitute chuan, tuialhthei man tihsan chu a hun loa an hriat thu sawiin, "Mizoram pumah kawng a chhia a, lirtheia eizawngtute min nghawng na em em. Kawng chhiaah kan motor a tângin a tlu a, inhnuh chhuah nan leh motor chhe siam nan cheng tam tak kan seng a, lirthei tam tak phei chu hmun tam takah an service thei lo. Dinhmun harsaa kan din mek laia sorkarin tuialhthei man man a tisang vak mai hi a hun kan ti lo," an ti.

MCVU hruaitute sawi danin, an pawlah hian lirthei association hrang hrang 10 an tel. MCVU-a tel Aizawl Two Wheeler Taxi Association chuan inhnûkdâwk chuang loin nawrh an thlâwp lo a, a bak zawng chu lungrual takin an kal a, pawisate an thawh khawm a ni.

MICORAM COMMERCIAL VEHICLE UNION-A TEL
1. Aizawl City Bus Owners' Assocation
2. Mizoram Truck Owners' Association
3. Mizoram Maxi Cab Owners' Association
4. Inter Maxi Cab Service Association
5. 407 Tipper Association
6. Pick-up Onwers' and Drivers' Association
7. Aizawl District Auto Rickshaw Onwers' Association
8. All Mizoram Car Rental Association
9. Mizoram Tipper Association (Drivers & Owners)
10. Aizawl Two Wheeler Taxi Association

MCVU NAWRH THLAWP LO TURTE
1. All Mizoram Petroleum Dealers Association
2. Mizoram Taxi Association
3. Petroleum Entrepreneur & Transporter Union Mizoram
4. Mizoram Truck Driver Association
5. Mizoram Oil Tanker Driver Association
6. Mizoram Indane Driver Welfare
7. All Mizoram Commercial Tipper Association (Owners & Drivers)
8. Champhai District Auto Rickshaw Owners Association
9. Lunglei District Tipper Driver Association
10. Aizawl Two Wheeler Taxi Association
11. Leitan Auto Rickshaw Welfare
12. Mizoram Distributor Association
13. Serchhip District Truck Owner Association