Minimum support price dawng turin society-a inziah luh phawt a ngai

Siaha, Serchhip, Saitual leh Hnahthialah nimin khan an district bawrhsapte kaihhruaiin Mizoram Agriculture Marketing Board member-te leh sorkar hotute'n Bana Kaih (Handholding) Policy hnuaia thlai hralh leh lei dan tur zirhona an buatsaih. Handholding Policy hnuaia thlai thlan chíngtuten minnimum support price an dawn theih nan society-ah an inziah luh a ngaih thu tarlan a ni.

Siahaah chuan additional DC Abraham Beirazi Khithie kaihhruaiin DRDO Conference Hall-ah 'Sensitization on Thlai Thar Market (Under the Mizoram Bana Kaih Scheme 2024)' buatsaih a ni a, Mizoram Agricultural Marketing Board (MAMB) member-te'n an telpui.

Thlai thar hralh dan tur te, thlai chingtute aṭanga a leitute a thlen dan tur te, collection centre aṭanga hralh dan turte inhrilhfiah a ni a; District Agricultural Marketing Committee (DAMC) mawhphurhna hrang hrang leh hmalak dan turte sawi anih bakah, zawhna leh chhanna hun hman a ni.

Serchhip District Agriculture Marketing Committee (DAMC) buatsaihin DC pisa hall-ah thlai thar lei leh hralh chungchang inhrilhfiahna hun hman a ni a; DAMC chairman Paul L Khuma, bawrhsap chuan, Agriculture, Horticulture, FCSCA leh Rural Development department-te'n hmunhma an neih mekte chu thlai thar dah khawmna atan a ṭangkai dawn thu a sawi.

Saitualah chuan DAMC chairman Dr Lalngura Tlau kaihhruaiin DC conference hall-ah ṭhutkhawm hun hman a ni a; Bawrhsap chuan, Bana Kaih policy hnuaiah Saitual district-a society 44 chu DAMC-in a pawm tawh thu a sawi a ni.

Hnahthial DC Rita Lalnunmawii Pachuau kaihhruaia DC meeting hall-a DAMC ṭhutkhawmah Hnahthial district-a thlai thar awmte leh thlai thar thehluttu awm zat hriat a, chumi mila chhinchhiahna mumal a awm theih dan tur te, thlai thar dah khawmna hmun tur chungchangte sawiho a ni. Collection centre mumal tak a awm theih nan ruahmanna siam ni se, an ti a, Hnahthial leh Cherhlunahte collection centre awm turin an rel.

HANDHOLDING POLICY ZIRHONAA TARLANTE

* Handholding Policy hnuaia thlai thlan bik chingtute chu society-ah an inziak lut ang.

* Society-a inziak lutte hian thlai hrang hranga sorkarin a bithliah minimum support price an dawng thei dawn.

* Sawhthing kg khat Rs 50 aia tlem loa kut hnathawktute'n an hralh theih nan ruamanna siam a ni.

* Society member-te'n an thlai tharte hi thlai thar dah khawmna (primary collection centre)-ah an dah khawm ang.

* Society-ten an duh dan leh remchanna hmunah primary collection centre an siam dawn.

* Primary Collection Centre aṭangin secondary collection centre-ah phurh khawm leh tur a ni.

* District tinah hmun thum/li ṭheuhah secondary collection centre siam a ni dawn.

* Secondary collection centre aṭangin company-te'n thlai an lei ang.

* Thlai tharte chu lilàm tur a ni a, company-te'n an chhanna chu sorkar bituk aia a tlem chuan bituk zat a tlin lohna hi sorkarin kut hnathawktute a pe dawn.

* Kut hnathawktute'n sorkarin a bituk sak aia sanga hralhna an hmuh chuan zalen takin an duhna apiangah an thlai tharte hi an hralh thei.

* Minimum support price an dawn duh erawh chuan society-ah an inziah luh a ngai thung.