Sorkar chhuahchhàl turin mipui chah

Mizoram Pradesh Congress Committee (MPCC) treasurer Dr Lalmalsawma Nghaka chuan, sorkar chu an thutiamah an ding em tih en tur leh an intiam anga an ti lo a nih chuan chhuahchhâl turin mipui a chah.

MPCC Treasurer hian nimina Sinlung Hills Council huam chhunga khaw ṭhenkhat a tlawhnaah thu sawiin, “Sorkar hi an thutiamah an ding em tih lo en rawh u. An intiam anga an ti lo a nih chuan an rawn kal hunah lo chhuahchhâl ang che u. MNF an rawn campaign hunah in intiamna cheng nuai 3 chu khawi nge, tiin lo zawt u la. ZPM an rawn campaign hunah kan phurrit chhâwk zângkhai turin ration buhfai leh tuialhthei man min tihhniamsak leh rawh u, kan hmunphiahte Rs 100 chuan min leisak rawh u, lo ti ang che u,” a ti.

Dr Lalmalsawma Nghaka chuan, NLUP a hlawhtling lo tite chu Sakawrdai leh a chhehvela kut hnathawkte tlawh a, an dinhmun zir chiang turin a chah a, Congress party chu thusawia ding nghet ṭhin a nih thu sawiin, "Congress tan kawl a êng. Kalphung thar mak tak kan hrawn mek a, mipuiin Congress bawk min enthla leh ta," a ti a; ZPM kaltlangin hmasawnna tak tak a awm dawn lo tih hriate Congress-ah an rawn lut zel niin a sawi.