SHC budget let eng emaw zat kan hai chhuahpui dawn che u - Dr R Lalthangliana
MNF senior vice president Dr R Lalthangliana chuan nimin khan November 5, 2024-a Sinlung Hills Council (SHC) inthlan tur pualin Suangpuilawn, Làmherh, Khawlêk, Vanbawng, Záwngin leh Phuaibuang khuaahte thu a sawi a; state sorkar kaltlang loin council budget lêt eng emaw zat sum an hai chhuahpui dawn thu a sawi.
Dr R Lalthangliana chuan, SHC budget chu autonomous a nih angin state sorkarin sum hrêka a tihbuai chi a nih loh thu leh danin a phal loh thu sawi a, "In budget let eng emaw zat kan hai chhuahpui dawn che u. SHC budget piah lamah state sorkar kaltlang ngai kher loin special project lian tham tak tak kan siampui che u ang a, thil lian tak tak tih dan kan hria, hma kan la dawn a ni," a ti.
Autonomous council chu India dan angin mahnia ro inrelna felfai tak nei a nih thu sawiin R Lalthangliana chuan, "Sorkarna kan siam a nih chuan kan enpui zel dawn che u a, dan leh hrai kan hre si a. Kan council pawh sum leh pai hmalakna kawng hrang hrangah kan vilpui zel dawn che u a ni," a ti a; council chu state sorkarin a duh duha a chin pawr theih a nih loh thu a sawi.
MNF Senior Vice President chuan, CSR aṭang pawhin council thuneihna hmangin sum pawh chhuah dan an hriat thu sawiin, "Heng zawng zawng kan tih theihna tur chuan kan candidate-te in thlan tlin ngei ngei a ṭul," a ti a; SHC inthlan turah MNF leh HPC(R) an thawk dun a, an tlin ngei a beisei thu a sawi a ni.
MNF treasurer Lalruatkima pawhin nimin leh Thawhṭanni khan Sihfa, Phullen, Phuaibuang, Khawlian, North East Tlangnuam leh Daido khuate a tlawhnaah thu sawiin, MNF party chhu an tihsualte siamṭhain an thawh leh dawn thu a sawi.
Lalruatkima chuan, "MNF kan tho leh dawn, kan hliam hluite dam rawh se. Kan tihsualte siamṭhain Zoram tan MNF a tho chhuak leh dawn. Pathian leh kan ram tan titu MNF hi Pathian vangin a dingchhuak leh dawn. MNF hi zalenna sualtu party kan ni a, Mizo hnam a awm chhung chu a ral dawn lo a, a dingchhuak leh dawn," a ti.
MNF Treasurer chuan, ZPM sorkar hnuaia harsatna thlengte sawiin, "Kawng hrang hrangin Zoram hi a buai nuai mai a ni. Neutral-te an beidawng tawh em em. Kum khat êm pawh an la sorkar hmain sorkar tla tur hun tawp lam hmang ang mai a ni, kawng tinrengah an buai nuai mai a ni," a ti bawk.