Project Intodelh Inzirtirna chungchangah Lokayukta-ah Congress ṭhalai an zualko

Mizoram Pradesh Youth Congress Committee (MPYCC) chuan Samagra Siksha leh Tharthilthlentu Entrepreneurship and MSME Support Society (TiLi) ten 'Project Intodelh Inzirtirna 2024-2025' atana thawh dunna an ziahah dik lo taka sum insiamna a awm nia ngaiin, chhui turin Lokayukta-ah nimin khan ngenna an thehlut.

MPYCC-in an tarlan danin, July 1, 2024 khan Mizoram Samagra Shiksha leh TiLi-in 'Project Intodelh Inzirtirna 2024-2025’ atan inremna (agreement) an ziak a, inremnaa a inziah ang chuan project fund chu Rs 59,00,000 a ni. Thuthlungah hian TiLi neitu leh Samagra Shiksha hotute bakah, Samagra enkawltu School Education Minister-in hming an ziak.

Ruahman dan chuan, sorkar sikul 10 - high school leh higher secondary school panga ve veah zirlaite hnenah Project Intodelh kalpui tur a ni a; project sum chu central-in 90% leh state-in 10 a tum dawn a ni.

Agreement-a ziah ang chuan project atana pawisa an pek chhuah dan tur chu fund aṭanga 40%, Rs 23,60,000 chu first instalment-ah Mobilisation Advance atan project agreement sign hunah pek tur a ni a, project setup atana hman tur a ni. Second instalment 30%, Rs 17,70,000 chu resource person-te'n training an pek vek hnua pek leh tur a ni a; third instalment 30%, Rs 17,70,000 chu project zawh vek tawh hnua pek tur a ni.

Samagra Shiksha An Integrated Scheme For School Education Manual on Financial Management and Procurement 2024 Chapter 7.7 Sl. No 7(c)-ah chuan cheng nuai 25 chin chung lam chu open tender hmanga thlan tur a ni a, Chapter 7.17.3-ah open tender koh dan tur a inziak vek bawk tih tarlangin MPYCC chuan, "He project-ah hian guideline-in a phût angin tender chhuah a ni lo," an ti.

Congress ṭhalaite chuan, TiLi chu ZPM spokesperson ú fapa ta a nih thu sawiin, "Party mi kan induhsak lo ang titute hian danin a phût anga tender leh quotation pawh chhuah loa project lian leh pawimawh, sum tam tak awmna advance payment Rs 23,60,000 lai mai an inpe hi a dik loin induhsakna uchuak taka an kalpui duh hi kalphung thar hian an hmui bak a pêl lo a ni tih a lantir," an ti.

Samagra Shiksha leh TiLi inremna thuthlung ziah dan chu duhsak zawng dan kalh leh tender siam loa hna inpekna a nih avangin MPYCC chuan chhui chian ṭul an ti a, a ṭul anga hma la turin Mizoram Lokayukta Chairman hnenah ngenna an thlen tih an tarlang a ni.