IAF kutah Airport pek an tum chuan a tàwp thlengin kan do dawn - Zorama

Nimin October 22 kha Mizo National Front din champha a ni a, MNF president Zoramthanga hoin Aizawla Mizo Hnam Rûnah lawm a ni. Zoramthanga chuan, Indian Air Force hnenah Lengpui Airport hlan tum a nih chuan a tàwp thlenga an do dawn thu a sawi.

Zoramthanga chuan, Lengpui Airport chungchang sawiin, "Mizoram nunna hnár, ram dang nen kan inpawhna a ni. Indian Air Force kutah kan Lengpui Airport hi Mizoram sorkarin pek an tum chuan MNF chuan a tàwp thlengin kan do dawn a ni. Airport hi mi dang kutah hlan a rem lo," a ti.

MNF President chuan, ZPM party chu kum khat pawh an sorkar hmain sum leh pai harsatna avangin an tâlbuai nia sawiin, tun ang zela an kal chuan rei an sorkar a rin loh thu a sawi. Mizoram hmun hrang hranga awm MNF-te chu phûr tak leh thâ thlah hauh loa ram leh hnam tan theihtawp chhuah zel turin a chah bawk.

MNF din champha vawi 63-na lawmnaah hian martarte hriatreng nan minute 1 chhung ngawi rengin an ding a ni.