AR IG-in nun thlak danglam duh

Assam Rifles Inspection General (East) Maj. General Ranjit Singh chuan midangte nun thlak danglam khawpa hnathawh tur a nih thu a sawiin, Mizo mipuite nun a ṭha zawnga thlak danglamna kawnga thawhhopuiah a sawm.

Mizo mipuite leh AR-te'n thawhhona ṭha zawk an neih theih dan tur ngaihtuaha Mizorama lokal Maj. Gen. Ranjit Singh hian nimin tlai khan Aizawla AR hmunah Central YMA, MFA, MZP leh MSU-te a kawmnaah thu sawiin, "AR-in mipuite tán thil tam tak kan ti ve tawh a, ka ngaih pawimawh chu midangte nun a thlak danglam em tih hi a ni. Midangte nun thlak danglam khawpa thawh kan duh," a ti.

Assam Rifles hotupa hian CYMA, MZP leh MSU-te chu ruihhlo do kawngahte, Myanmar aṭanga dan phal loh lo lut tur ven kawngahte leh mipui tana hmalakna-ahte thawhho dan tur a sawipui a, MFA hruaitute chu football lama thawhhona ṭha neih zel dan tur a sawipui thung. 

23 Sector Assam Rifles commander Brig. Digvijay Singh chuan Mizorama AR-in mipuite tana hna an thawh hrang hrang leh Myanmar lam aṭanga ruihhlo leh sorkar phal loh thil lo lut tur dan kawnga an thawh dan a sawi.

Pawl hrang hrang aiawhte pawhin ṭul leh ṭha nia an hriatte an sawi hlawm a ni.