KHAWTHLIR

Inrinni khan KṬP, Ramhlun Vengchhak Branch leh Ramhlun Vengchung Branch chuan Ramhlun Vengchhak Kohhran Khualchhawn Bûkah Synod Hospital tan unit 42 an pe a, petute mipa 37 leh hmeichhia panga an ni. Aizawl Civil Hospital tan Armed Veng South Branch YMA-in an din champha vawi 34-na pualin unit 42 pein, petute mipa 35 leh hmeichhia pasarih an ni a, Zofa Cultural Club, Chanmari West pawhin unit 25 an pe. ṬKP, South Vanlaiphai bialte'n Lunglei Civil Hospital tan unit 45 an pe a, petute mipa 42 leh hmeichhia pathum an ni a; ṬKP, Maranatha unit, Lawngtlaite'n Lawngtlai District Hospital tan unit 19 (mipa 15 leh hmeichhia 4) an pe bawk.

February 1, Inrinni zan dar 11 vel khan Chanmari leh Chaltlang inkar kawngpuiah i10 car a chesual a, kawng thlangah tlain, thui tak a lum a; car-a chuang Lalrinnunga (23) s/o Lalneihmawia, Chaltlang Ruamveng leh R Zothansanga (48) s/o R Rualkhuma (L), Chaltlang Venglaite chu chetsualna hmunah an thi.

Mara Autonomous District Council (MADC) hnuaia village council panga - Siaha Vaihpi-III, Siaha College Vaih-II, Kaochao East-II, Zyhno-I leh Khaikya khuaah January 31, Zirtawpni khan village council by-election neih a ni a, vote chhiar nghal a ni. Inthlanah hian V/C seat 13 zinga seat 10 chu BJP-in an la a, MNF-in seat pathum an la thung.

Vawiin aṭanga February 5, Nilaini thlengin zing dar 9 leh tlai dar 4:30 inkarah Treasury Square aṭanga Pi Pangi Péng inkar kawngpui siamṭhat hna PWD-in an thawk dawn a; hna thawh chhungin he kawngpui hi a zatve khâr zel a ni dawn tih Traffic SP Rodingliana Chawngthu chuan a tarlang. Lirthei khalhtu leh kea kalte chu hna thawktute tibuai lo thei ang ber leh fimkhur taka kawng hmang turin a hriattir a; kawngpui sirah lirthei leh bungrua dah phal a nih loh thu a tarlang bawk.