Minister-in Zomedplants a tlangzarh

Health minister Dr R Lalthangliana chuan nimin khan Secretariat conference hall-ah State Medicinal Plants Board (SMPB), Mizoram leh Angel Business Promoters buatsaih ramhmul aṭanga thil siam chhuahte chhinchhiahna tur 'Zomedplants' a tlangzarh.

Dr R Lalthangliana chuan, Mizorama ramhmul awmte zir chiang a, Zomedplants kaltlanga mihringte tana hrisel tur thil chi hrang hrang siamna tur ruahman chuan Mizoram tan a ṭha zawngin thil thar a thlen ngei a rin thu a sawi a, "Covid-19 vangin ṭhalai tam tak phai lama an hna chhunzawm thei loin an rawn haw a, anni tan pawh hmalakna remchang leh entrepreneurship lama min tiṭhangharh zualtu ni ngei se a duhawm hle," a ti.

Health Minister chuan, Pathianin thei leh ramhmul hmanga malsawmna tam tak Mizorama a dahte chu a ṭangkaina phawh chhuah a nih chuan, nasa lehzualin Pathianin malsawmnain a vûr belhchhah ngei tur thu a sawi.

Zomedplants hi ramhmul aṭanga thil chi hrang hrang siam chhuahte chhinchhiahna tur (brand name) a ni a; ramhmul damdawi aṭanga ei leh in mai theih tur siamte chu Zomedplants hmingin mipui lei theih turin zawrh a ni ang.

Tlangzarh inkhawmah hian Zomedplant siam chhuah hmasa ber, Mizo sunhlu (dry candy) leh detox tea pho chhuah a ni.