MLA-in a biala harsatnate a enfiah

Lunglei North bialtu MLA Dr Vanlalṭanpuia chuan tun hnai khan a bial chhunga harsatna hrang hrang thlenna hmunte a tlawh a, chinfel dan tur a ngaihtuahpui.

Dr Vanlalṭanpuia chuan, Lunglei leh Aizawl inkar, Tlawng-Pukpui inkar APL road chhe zual lai chu Lungleia PWD hotute leh kawng siamtu Bhavya company Manager hruaiin, fûr thlen leh hmaa ṭha taka siam zawh a nih theih dan tur a enpui.

MLA hian Pukpui Health Sub-Centre a tlawh a; Sub-Centre bula Health department bus chhe tawh pathum dah chunga electric hruipui kalin Pûkpui naupang a man chhanchhuaktu naupang pahnih Jollin-a leh Joseph-a te hnenah chawimawina Rs. 5,000 ve ve a pe. Lunglei CMO, SMO leh Medical Superintendent-te hnenah bus chhe tawhte chu dah sawn a, lilàm thuai a nih theih nan hma la turin a chah.

Dr Vanlalṭanpuia hian NH-54 Aizawl-Tuipang kawngpui siam hna thawk mektu NHIDCL General Manager chu a pisaah a kâwm a; chak leh ṭha zawka hna thawh theih dan tur te, thawktu atan tualchhung mi tam zawk an luh theih dan tur te, corporate social responsibility sum mipui tan ṭha leh ṭangkai zawka hman theih dan turte a sawipui a ni.