Finance-ah MGNREGA sum a táng Vbc 12 hman anga tarlan la hmang lo

Sorkar kum liam ta, 2014-15 chhunga MGNREGA hnuaia inhlawhna tur sum sorkar laipuiin Mizoram sorkar a pek cheng vaibelchhe 12 chu Mizoram Finance department-in a la pe chhuak lo a; chutih laiin cheng vbc. 12 chu hmang zo tawh angin Mizoram sorkarin sorkar laipuiah a hriattir thung.

MGNERGA nodal department, Rural Development department hotute'n Vanglaini palai zawhna chhanga an sawi danin, kum 2014-15 chhung atana MGNREGA hnuaiah Central-in Mizoram sorkar hnenah March 9, 2015 khan cheng vbc. 12 a pe a; mahse Mizoram sorkar sum harsatna vangin Finance department chuan kum 2014-15 hmain a pe chhuak thei lo.
RD department hotute chuan, sorkar kum thar 2015-16 kai a ngaih dawn tawhah pawh Finance department-in sum a la pek chhuah theih si loh avangin inhlawhna tur vbc. 12 chu hmang tawh angin Central-ah an hriattir tih sawiin, "Pawisa hi hmang tawh anga kan ziah loh chuan sorkar kum tharah Central-in opening balance-ah a rawn hmang dawn si a, opening balance-a an rawn hman chuan kum 2015-2016 a mipui inhlawhna tur a tlem phah dawn a ni. Pawisa hi Finance dept.-in min pek hunah mipui ta tur tho a ni," an ti.
Hetih lai hian, Central chuan kum 2015-16 chhunga MGNREGA hnuaia inhlawhna atan April 6, 2015 khan cheng vbc. 7.61 a rawn pe leh tawh a; mahse Finance department-in RD department-ah a la pe lo.
Kum 2014-15 leh 2015-16 chhunga MGNREGA hnuaia mipuite inhlawhna tur sum Central-in Mizoram a rawn pek, Finance department-a táng mek chu vbc. 19.61 a ni.
Central-in MGNREGA kum 2015-16 atana a rawn pek, cheng vbc. 7.61 chu tlem tham deuha hriat vangin Mizoram sorkar official-te chuan tam zawk pe turin Central-ah an thlen leh nghal. Ministry of Rural Development-in tih tur a tih zawng zawngte ṭha takin Mizoramin a ti nia sawiin, RD hotute chuan, Mizoram aia inhlawhna kalpui ṭha lo zawk Nagaland pawh kum hmasa aia an pek tam zawk avangin sum tam zawk pe turin Central an ngen tih an sawi.
RD department hotute ngenna hi Ministry of RD hotute chuan Central-in budget puitling a la neih rih loh avangin an la pek tam loh thuin an lo chháng niin an sawi a; May 2015 chawlh­kar thumnaah April-September 2015 daih tur rawn pek leh an lo tiam niin an sawi bawk.
Hetih lai hian, Aizawl district bikah chuan, MIS report-a sum an hman tawh anga an tarlan tel, Rs. 9,638,200 chu Finance-in an pek hunah ni hnih inhlawh theihna tur a ni a, chumi nen chuan kum 2014-15 chhungin ni 27 an inhlawh thei dawn a ni. Ni hnih inhlawhna an siam belh loh erawh chuan ni 25 chiah an inthawh thung.