Gutkha, pan masala, zarda zawrh khap
Mizoram State Tobacco Control Society (MSTCS) chuan Inrinni khan Aizawl Press Club-ah thuthar thehdarhtute an kâwm a; vaihlo leh a kaihhnawih gutkha, pan masala leh zarda ang chite chu danin zawrh chhuah a khap thu an sawi a; zuar lui an awm chuan na taka hrem theih an nih thu an puang.
Vaihlo dona lama hotute leh chanchinbu mite inkawmna hi Health principal director leh Food Safety commissioner Dr K Ropari'n a kaihruai a; Dr K Ropari chuan, tun hnaia ICMR mithiamte'n Saiha district-a infant mortality rate san chhan an zir chiannaah, kuhva ei, khaini leh sahdah hmuam leh meizûkte chu a chhan pakhatah an ngai tih a sawi.
Dr K Ropari chuan, ei chi reng reng chu Food Safety and Standards (Prohibition and Restrictions on Sale Regulations) hnuaiah khap a nih thu sawiin, vaihhlo leh nicotine telna ei turte pawh a huam thu a sawi a, "Mizoram sorkar chuan August 22, 2012 khan hetiang thilte hi Mizorama lak luh a lo khap tawh a ni," a ti.
ISTH, Mizoram Chapter president Lal Riliani chuan, Mizoram chu zuk leh hmuamin a chiah hne hle ṭhin a, mahse tunah chuan a ziaawm ve tawh hle niin a sawi a, "Tun hma chuan chanchinbuahte zuk leh hmuam ṭhat loh thu ziah a tam lo a, tunah erawh chuan media-te'n an puang tam a, zuk leh hmuam do kawngah media-te'n an thawh hlâwk hle a ni," a ti.
MSTCS-a nodal officer Dr Jane Ralte chuan Food Safety and Standards (Prohibition and Restrictions on Sale Regulations) hnuaiah gutkha leh a kaihnawih ei turte zawrh leh hralh khap a nih dan leh dan bawhchhiate hrem theih dante a sawi a; dan bawhchhiate chu Rs. 2,00,000 thleng chawitir theih an nih thu leh, an thil zawrhin mihring taksa a tichhia tih finfiah a nih phei chuan Rs. 10,00,000 thleng chawitir theih an nih thu a sawi.
Zawhna chhangin, Dr Jane Ralte chuan, India leh Myanmar-te dan anga insumdawn tawn theihna item zingah cigarette a tel loh thu a sawi a; May 31, 2015-ah World No Tobacco Day hman a nih dawn thu leh thupui tur chu 'Stop illicit trade on tobacco products' tih a nih thu a sawi bawk.