Inthlan theih lohna V/C 31 ṭhiah a ni

HPC(D)-te vauna vanga April 30, 2015-a village council inthlanna neih ve theih lohna khaw 31-a V/C-te chu Mizoram sorkarin a ṭhiat.

Mizoram district paruka V/C-te leh local council-te term ding lai chu April 30, 2015 khan a tawp angin, inthlan ve theih lohna khaw 31-a V/C ding laite term pawh a tàwp ve nghal a; Mizoram sorkar chuan The Lushai Hills District (Village Cuncils) Act 1953 tlawhchhanin, khaw 31-a V/C ding laite a ṭhiat nghal a ni.

Inthlan ve theih lohna khaw 31-te chu felfai taka inthlanna buatsaih theih a nih hma chuan Aizawl leh Kolasib district-a DLAO (Local Administration Officer)-te'n an enkawl rih dawn a; ni tina V/C-te inrêlbâwlna kawnga tih tur ṭulte chu field inspector leh assistant field inspector-te'n an kengkawh dawn a ni.

HPC(D)-te vauna vang hian Aizawl district-a khaw 25 leh Kolasib district-a khaw parukah V/C inthlan neih theih a ni lo a, chuh tura hming pe lut ngam an awm lo a ni.

HPC(D) vanga inthlan theih lohna khuate chu - Aizawl district-ah Dáido, Damdiai, Khawlian, Khawpuar, Làmherh, Lungsum, Mauchâr, N. Khawdungsei, North Khawlêk, North Ṭinghmun, NE Tlangnuam, New Vervek, Palsang, Phuaibuang, Ratu, Sailutàr, Sakawrdai, Suangpuilawn, Sunhluchhip, Thingsât, Vaitin, Vanbawng, Záwngin, Zohmun leh Zokhawthiang-te a ni a; Kolasib district-ah Saipum, Saiphai, N. Hlimen, Phainuam, N. Chawnpui leh Saihapui-V te a ni.