HSA hruaitute'n CM an kâwm

Hmar Student's Association (HSA) Joint Headquarters, Aizawl hruaitute chuan nimin khan chief minister Zoramthanga a pisaah an kâwm a; Zo hnah­thlak insuihkhawmna atan a pawi­mawh avangin inkalpawhna kawng tihchangtlun dan tur  an sawipui.

HSA hruaitute chuan, National Highway-02 (tun hmaa 150 tih ṭhin)-a Tuivai lei (bridge), kum 20 chuang dawh tawh loh, sanction awm vek tawh si chu a hlawhtlin vat theih nana hma la turin CM an ngen.

Hemi chungchangah hian CM Zoramthanga chuan, lei dawhna turin tender vawi thum chhuah a ni tawh tih sawiin, "A chhangtu contractor-te'n estimate aia sanga an chhàn avangin sorkar laipui chuan insawifiahna pe turin a rawn ti a, department lamin clarification an pe tawh. Hei hi Ministry of Road Transport & Highway lamin an rawn pawm a nih chuan hna thawh ṭan nghal theih a ni ang," a ti.

Zoramthanga chuan, New Vervek leh Tuivai inkar kawng km. 10-a thui Nidhi company-in an khawih mek tichak tura a hrilh tur thu sawiin, "Hun tiam chhunga lei dawh hman a nih loh chuan ferry system ruahman mai a ṭul thei," a ti a; NH-306(A) New Vervek - Vairengte via Mauchar chu proposal siam vek tawh a nih thu a sawi bawk.

Chief Minister sawi danin, hnam project atan PMGSY leh national highway kawngte'n a la tlawhpawh loh Zokhawthiang leh Ṭinghmun inkal pawhna kawng chu bialtu MLA Lalchhandama Ralte nen an buaipui mek a ni.