Helho kan thurualpui ve ngai lo; Helna tihreh kan tum zawk: MPCC

MPCC Media Cell hruaitute chuan Inrinni khan Aizawl Press Club-ah thuthar thehdarhtute kâwm­in, an party chuan hel a duh ve lo niin an sawi a, "Congress party chuan hel ho kan thurualpui ve lo," an ti.

MPCC Media Cell chairman James Thanghmingmawia chuan, khaw 31-a V/C inthlan theih a nih loh chhan chu Congress sorkarin helna ṭha a tih loh vang nia sawiin, "Dan angin sorkarin an thil tih dik loh avangin helte an man a, sorkar hmalakna hi hel ho hian an duh loh avangin mipui an vauah kan ngai," a ti a; Congress party chu eng lai maha hel zawm ngai lo, helna tihreh tuma hma lak zawk ṭhin an nih thu a sawi.

James Thanghmingmawia chuan, tun hnaia HPC(D)-te'n Mizoram police pathum an kap hlum leh MLA pathumte an ṭhuihruaite mangang taka an siam chu Mizo mipuite'n an dem tih a sawi a, "Opposition lamin Congress party chu helte nena inzawm anga sawi an tum hi a vanduaithlak tak meuh. Hel nena inthlun zawm ṭhin chu MNF an ni a, kum 10 an sorkar chhung khan rálmuanna tiderthawng khawpin Aizawl leh hmun dangah hel an tlangnel a ni," a ti.

Central-a BJP sorkar hnuah Mizoramin sum lamah hrasatna a tâwk tih sawiin James Thanghmingmawia chuan, "MNF-in sorkar an sawisel vak vak mai hi hriatthiam a har hle," a ti a; Central-in state hnena sum a pek dan tihdanglam a tum avangin Mizoram mai ni lo, hmarchhak state zawng zawng an mangang niin a sawi.

James Thangmawia sawi danin, tun hnai khan hmarchhak state pariata chief minister-te'n Joint Memorandum siamin, prime minister Narendra Modi hnenah special category nihna hlih sak lo tur leh Central sorkar aṭanga fund dawn ṭhinte a pangngaia kaltir leh turin an ngen a; chumi bawhzui chuan May thla laihâwlah hmarchhaka CM-te chuan PM an hmu dawn a ni.

James Thanghmingmawia chuan kohhranin zu zawrh an duh loh denchhena mipui fuihpawrhah MNF puhin, "Zu kan zuar a, ṭhenkhatin an hlauhthawn, zu rui leh ruih vanga buaina kan tâwk lo hi a lawm hle. Kan duh chuan Mizote hi zu lakah kan inthiarfihlim thei a ni tih a lantir chiang hle," a ti.

Mizo hnathawh dan leh nunphung a ṭha zawnga a kal theih beiseiin sorkarin sikul ṭan hma a rawt tih sawiin, James Thang­hmingmawia chuan, "Sikul kai hma dodaltu zirlai pawl pakhat chuan sorkarin enchhin a nih chhung hrethiam tura an ngen avangin harsatna an siam zui lo," a ti a; Mizoram chhim lama sikul ṭan hma duh loh vanga harsatna siam an la awm chu pawi an tih thu a sawi.