VC leh LC result inthlan result a chiang ta

Mizoram district paruka village council leh Aizawla local council inthlan result chu hriat kim a ni ta a; VC 504 leh LC 83-ah Congress party-in seat 1,317 lain, LC leh VC 308-ah hnehna an chang a, MNF-in seat 918 lain, LC leh VC 165-ah hnehna an chang thung.

Aizawla LC 83 zingah INC-in seat 254 la-in, LC 39-ah hnehna an chang a; MNF-in seat 239 lain, LC 38-ah hnehna an chang a, LC pakhatah MPC nen ṭangkawpin hnehna an chang bawk. Mission Vengthlang leh Tuithiangah independent-te'n LC an siam thei a; party mal chak bik awm lohna LC pathum - Ṭhuampui, Lawipu leh Republic Veng-te an awm.

Local council inthlanah hian vote 67.64% a tla a; a tlak ṭhatna ber Chite-ah 86.19% a tla a, a tlak chhiatna ber, Bawngkawnah 56.60% a tla thung.

District paruk - Aizawl, Lunglei, Serchhip, Champhai, Mamit leh Kolasib district-a VC 504 thlannaah INC-in seat 1,063 lain, VC 269-ah an chak a; MNF-in seat 679 lain, khaw 127-ah an chak thung. ZNP-in seat 87 lain khaw parukah hnehna an chang a; BJP-in seat 29 lain khaw pangaah VC an siam thei. MPC-in seat 15 la mahse, VC siam theihna an nei lo a, Independent-ten seat 258 lain, khaw 45-ah VC an siam thei a; party mal chak bik awm lohna VC 50 a awm bawk.

VC inthlanah hian Khawzawl VC-I (Electric Veng)-ah chuan VC ramri siam dana lungawi lohna vangin inthlan boycott a ni a, vote thlak an awm lo. Champhai district-a Mimbung khuaah May 1 khan vote thlak ṭhat a ni a; Champhai district veka Ruantlang khuaah chuan VC hran neih phût vangin Mualveng mipuite'n vote an thlak lo a, vote tla pawh 56.42% chauh a ni.

LC leh VC thlanah hian executive body chu May 7, 2015 aia tlai loah din fel tur a ni a, inthlanna pumpui chu May 8-ah zawh fel vek tur a ni.