Darkar 24 DD channel siam dawn

Doordarshan director general C Lalrosanga chuan, tun aṭanga rei lo têah hmarchhak biala Doordarshan Kendra tinte'n darkar 24 satellite channel an nei dawn tih a sawi a; DD channel zawng zawng chu direct to home (DTH) kal­tlanga pek chhuah thuai tum a nih thu a sawi bawk.

C Lalrosanga hian Inrinni tlaia DDK Aizawl a tlawhnaah thu sawiin, ni tin darkar 24 chhung satellite channel hmanga programme pe chhuak ṭan thei turin bawhzui ngaite chak taka bawhzui mek a nih thu a sawi a, "Khawl thar leh thil dang buaipui a ngaih avangin thla 7/8 emaw hnuah chuan a taka programme tihchhuah ṭan theih beisei a ni," a ti.

DD DG C Lalrosanga chuan, Doordarshan-in channel thar pathum a neih tur thu sawiin, chung zinga loneitute puala siam Kisan Channel chu May thla tawpah hawn hman beisei a nih thu a sawi a; DD Sports chu tihchang­tlun a nih tur thu leh, DD India channel siam a nih tur thu a sawi bawk.