Civil Hospital Labour Room a kâng ACH-ah nau a neih theih hrih loh

Nimin chawhnu dar 3:15 khan Aizawl Civil Hospital (ACH)-a nau neihna ward (labour room)-ah kangmei a chhuak a, a kan nasat hmain ṭhelh a ni a, thi leh hliam an awm lo. Hei vang hian ACH-ah nau neih theih a ni rih lo.

ACH medical superintendent Dr Rosangluaia hnen aṭanga thu dawn danin, kangmei hi gas pipe leak aṭanga chhuak a ni a, a kan veleh fire extinguisher-in an phuh nghal a, Fire & Emergency Services mi an koh nghalte'n an pui bawk a; a kan nasat hmain ṭhelh mih a ni.

ACH Labour Room hi kang nasa lutuk hma lo mah se, damdawi lam hmanrua te, damdawite leh lehkha pawimawhte a kâng chhia a, electric wiring-te leh darthlalangte a kâng bawk.

Labour Room-a nau nei tur awm mekte chu Kulikawn damdawi-inah sawn phei vek an ni a; Labour Room hi thawm ṭhat hna thawh nghal ni mah se, vawiinah chuan hman theih a ni dawn lo a, naktukah chuan hman theihin an peih hman mai thei niin Dr Rosangluaia chuan a sawi.