RMSA hnuaia thawk ṭhin ten chaw chhuan 13 nghei tawh
RMSA hnuaia laboratory attendant leh clerk-te bakah SCERT Guidance and Counselling-a thawk tun hnaia bàn takte chuan chaw nghei an la chhunzawm zel a; chaw chhuan sawm an nghei hnuah pawh sorkar aṭanga an chanchin ngaihven an la awm loh thu an sawi.
Chaw ngheite zinga an hruaitu, R Lalnunzira chuan, chaw chhuan 13 an nghei hnuah pawh sorkarin ngaihsak ṭha duh loin, sorkar hotute'n ràl aṭangin an tâwng duh lek chauh nia sawiin, an rilru a nat thu a sawi.
An hnathawhna aṭanga bàn takte hian April 27, 2015 aṭangin PRISM office-ah chaw an nghei ṭan a, tui an in bak thil dang an ei lo. Taksa chauh lutuk avangin mi 10 chu damdawi-in panpui an ni tawh a, May 1 zan pawh khan mi pali chu damdawi-inah hruai leh an ni.