Mizoram chhunga Presbytery siam tharte hawn a ni
Mizoram Presbyterian Kohhran chuan May 2, 2015 khan kum 2014-a Synod Inkhawmopui thurel angin, Mizoram chhungah Presbytery siam tharte an hawng.
Aizawl Hmar Presbytery aṭanga indang, Aizawl Hmarchhak Presbytery thar chu Inrinni khan Bawngkawn Chhimveng biak-inah Synod executive secretary Rev. Lalramliana Pachuau-in hawngin, Pathian hnenah a hlan a ni.
Aizawl Hmarchhak Presbytery-ah hian pastor bial panga - Zemabawk, Bawngkawn, Thuampui, Zemabawk North leh Airfield Vengthar Bial-te an tel a, kohhran 21 an awm.
Inrinni vek khan Aizawl West Presbytery pawh Aizawl West-I leh Aizawl West-II Presbytery-ah ṭhen a ni a; Serlui Presbytery leh Hmarthlang Presbytery-te pawh ṭhensawmin, Kolasib Presbytery, Hmarthlang Presbytery leh Serlui Presbytery-ahte then a ni bawk.
Presbytery thar hawn a nih hnuah Special Presbytery Inkhawmpui neih nghal a ni a, moderator tura thlante hnenah moderator mawhphurhna hlan a ni. Inkhawmpui hi nizan khan a ṭiak a ni.