Ṭhuampui YMA-in ruihhlo an man an tiral

Ṭhuampui Branch YMA hnuaia Vigilance Sub-Committee-in ruihhlo an man khawm cheng nuai 12 chuang man chu an veng thlànmual ramah nimin khan an tichhia. Ruihhlo ṭhenkhat chu hâl a ni.

Ruihhlo hâltu Central YMA president Vanlalruata chuan, theihtawpa ruihhlo do a ṭul thu sawiin, "Kumin chhung ringawt hian ruihhlo vangin Mizoramah mi 62 an thi tawh a, hei nen hian Mizoramah ruihhlo vanga thi mi 1,641 zet an ni tawh. Hei bakah hian, record loha thi tam tak an awm a rinawm. Mizo ṭhalaite kan harh a hun tawh tak zet," a ti.

Ṭhuampui Branch YMA president K Lalrimawia pawhin thu sawiin, ruihhlo an mante hâl ral turin Covid-19 boruak ziaawm deuh lai an chuh thu a sawi.

Ruihhlo an tihchhiatte chu - heroin hawng 5, penicilin bûr 33, chhin sen 12, bagha cap 90, ganja kg. 14, alprazolam tlêp 11, Royal Stag ûm 395, beer can 22 leh rakzu litre 65 a ni.