Inspection Team-in Mamit an endik

Mizoram Cleanliness Competition, 2020 endiktu inspection team chuan nimin khan Mamit khawpui an endik a; district bawrhsap Lalrozama'n lo dawngsawngin, DC conference hall-ah an inkâwm.

Mamit DC chuan, faina chu mi tin mamawh leh hmasawnna tur a nih angin uar takin an district-ah hma an la tih sawiin, "Mamit khawpui chhungah khawtlang hruaitute hmalaknaa veng chhung faina kawnga ṭan an lakna a lawmawm hle," a ti a; endik hun atan chauh ni lo, engtik lai pawha fai tura ṭan la zui zel turin district mipui a sáwm.

Mamita UDPA officer C Sawihlira chuan, an district-in faina kawnga hma a laknate sawiin, district chhung khua/veng hrang hrangah naupang kum 5-13 telna children sanitation club (CSC) 97 din a nih tawh thu a sawi.

Inkawmhonaah hian inspection team member-te'n zawhna an neihte chu district official-te'n an chháng a; Mamit khawpui chhung hmun hrang hrang an endik bawk a ni.