MRB-in thu dik lo a nih thu an puang

Mizoram Rural Bank (MRB) chuan thuchhuah siamin, ei leh bàra Mizoram intodelhna turin theihtâwp an chhuah a, loneih, ranvulh leh huan siam kawnga tuite ṭanpui turin an inhawng reng tih an tarlang a; tun hnaiah mi ṭhenkhatin MRB-ah KCC loan rulh ngai lo an buaipuisak thei anga thuthang chu a dik loh thu an sawi bawk.

MRB chuan,  loneih, ranvulh leh huan siam kawnga tuite ṭanpui turin an inhawng reng tih sawiin, "Hetiang mite hnenah hian loan pawh kan pe chhuak reng a ni. Tun hnaiah mi ṭhenkhatin MRB-ah KCC loan rulh ngai lo an buaipuisak thei ni âwmin thu a thang a, hei hi thu dik lo, inbum tumna thil niin a lang. Bank aṭanga loan lâk reng reng a pung nena rulh leh ngai a ni," an ti.

Loan chu mimal emaw, department emaw kaltlanga dil kher a ngai lo tih sawiin, "KCC loan mamawh chuan an mamawh dan azirin an account neihna MRB branch-ah dil mai theih a ni," an ti a; loan dilna form chu an website-ah lak (download) theih a nih thu an tarlang.