Sangha man chungchangah Dan anga hma la turin ngen

Peoples' Conference party chuan Mamit DFO hnenah lehkha thawnin, November 21, 2020-a Phaizau khaw bul Tut luia sanghate bomb hmanga beih a nih chungchang chu chhui chiang a, dan hmanga dik taka hma la turin an ngen.

PC party thuchhuah chuan, November 21-a Phaizau khaw bul Tut luia bomb hmanga sangha mantute man an la nih loh avangin hma la tura ngenna Mamit DFO hnenah an thehluh thu leh, mipuiin diknaa rorelna an hmuh thuai an beisei tlat thu an tarlang.

PC party chuan, bomb hmanga sangha man vangin mi tam tak man leh hrem an ni tawh tih sawiin, November 21-ah bomb hmangin Tut luia sangha man a ni tih chu finfiahna thlalak tam tak a awm bakah, sangha mantute'n pawisa an chawi tih an tarlang a,

"Finfiahna chiang tak a awm chungin tun thlengin sangha beitute man an la ni lo. Sangha mannaah hian Mamit bialtu MLA H Lalzirliana a tela sawi a ni a, mipuiin thu dik kan hriat nan chhui chian a ngai zual a, dikna rorelna lekkawh ngei a ṭul zual a ni," an ti.