MCVU-in lungawi lohna an lantir; Ruahman lâwk ai hmain an titâwp

Mizoram Commercial Vehicle Union (MCVU) chuan tuialhthei man sang leh kawng chhia vanga lungawi lohna lantirna atan nimin khan an lirtheite an tlàntir lo a, an ruahman lâwk aia hmain lungawi lohna lantir an titâwp.

MCVU-te'n lungawi lohna an lantir chhung hian hmun ṭhenkhatah duty an indah a, duty-te hian an member-te lirthei a tlan leh tlan loh an thlithlai a ni. Anmahni thlâwp lotu sumdawng lirthei tlânte chu an tibuai lo a, harsatna thleng a awm hriat a ni lo.

Mizoram sorkar chuan lungawi lohna lantir zingah city bus an tel ve avangin Aizawlah chuan Kulikawn leh Zemabawk inkarah MST bus 14 a tlantir a, bus-ah chuang an ṭhahnem ṭhin hle. Two wheeler taxi leh four wheeler taxi-te chu an vaia an tlân chhuah phal a ni.

MCVU hian October 22, Thawhlehnia thuthar thehdarhtute an kawmnaa an sawi dan chuan, lungawi lohna hi zing dar 6 aṭanga tlai/zan dar 6 thleng lantir an tum a; mahse, nimin khan tlai dar 4-ah lungawi lohna lantir an titawp. An hun tiam hmaa an tihtawp chhan hi an nawrhna chu a hlawhtling thawkhata an hriat vang niin an tarlang.

Lungawi lohna lantir an tihtawp hnuah MCVU chuan thuchhuah siamin, Mizoram puma lungawi lohna an lantirah district hrang hranga an member-te'n hneh taka duty an hlen chhuak te, anmahni thláwptute leh an member-te dan ngai loa lungrual taka an thawhhonaah te, duty hah tak takte inpekna leh hawihhâwm taka duty-te chungah an lawm thu an tarlang.

MCVU chuan, lungawi lohna an lantir chu a hlawhtling thawkhata an hriat thu tarlangin, "Chuvangin, tlai dar 4 khan lungawi lohna lantir tihtawp a ni," an ti.

Tarlan tawh angin, MCVU hian a tirah chuan lungawi lohna lantir hi tiamchin awm loa kalpui an tum a; mahse, YMA Rorel Inkhawm leh kohhran inkhawmpui awm tur chhuanlamin ni khat (October 23) chauh kalpui turin an ti leh ta zawk a ni.