Eirûknaa hmingchhia kan la awm lo - Dr Vanlalthlana

Minister Dr Vanlalthlana chuan, ZPM party-in an sorkar huna an tih tur an sawite chu vawi leh khatah tih nghal vek theih ni lo mah se an tih mek zel thu leh ZPM sorkara minister-te chu eirûkna vanga hmingchhia an la awm loh thu a sawi.

Dr Vanlalthlana hian Sinlung Hills Council inthlan atan campaign-in nimin khan Sunhluchhip, Sailutar leh Ratu khuaahte thu a sawi a, "Kan ti ang kan tihte kan ti chho mek a, vawi leh khata engkim tih nghal theih a ni lo. Hun rei tak sorkarna lo chang tawhte'n an tih theih loh kan ti chho mek a, kan ti lo ang kan tihte pawh kan ti lo khawp mai," a ti.

ZPM MLA-te chu corruption laka fihlim turin an intiam tih sawiin Vanlalthlana chuan, "Vawiin thlengin Pathian zarah eirukna laka hmingchhia kan awm lo a, thil lawmawm tak leh kan thutiama kan rinawmna lantirna a ni. Eirukna lakah pawh fihlim zel kan tum," a ti. Aikal lâk titawp tura hmalak harsa hle mah se, ram tana ṭha turah chuan nghet takin an ding zel dawn tih sawiin, an hmalakna chu mipuiin an hriatthiampui an beisei thu a sawi.

Dr Vanlalthlana chuan, epty party-te chu inenfiah tura chahin, "Mipui rilru hruai kâwi an tum ṭhin. Eptu party-te hi inenfiah ve se kan duh hle a, mipui rilru hruai kâwi tuma politics an khelhna kawngah hian thu dik leh belhchian dâwl hmang ṭhin se kan duh hle a ni," a ti.

Education Minister chuan, sorkarna an chan hnuah sorkar hnathawk hlawh a theih chen chenah a hun takah an pe tih a sawi rualin, "Central scheme hnuaia thawkte hlawh hi kan thuneihna piah lam a nih avangin duh huna pek theih loh cháng a awm lo thei lo a, a changtu minister ka nihna ang pawhin pawi ka ti tak zet," a ti a; sikul naupangte chawchhun chungchangah, "Sorkarin sum inpek dan kalphung a tihdanglam avangin harsatna kan tâwk a, keini pawhin hrehawm kan ti," tiin, a kal dik leh thuai dawn thu a sawi.

Bana Kaih (Handholding) Scheme hnuaia ṭanpuina dilna chu online-a kalpui a nih thu sawiin Vanlalthlana chuan, "Hei hian party politics leh induhsakna laka sorkar fihlim a tumzia a lantir a ni. Sem policy hmanga hma la ṭhintute chuan politics khelh nan NLUP leh SEDP an hmang ṭhin a, keini chuan mi taima leh tumruhte party bik sawi loin kan thlang dawn," a ti.

Dr Vanlalthlana chuan, tuialhtheia chhiah lak tihsan a nih chungchanga sorkar ruahmanna chu mipuiin an hrethiam hle nia sawiin, "A chhan chu, chhiah kan lakte hi mipuite tana hman tur a ni a, zirna, hriselna, hmeichhiate tan leh kawng siamṭhatna atana hman tur a ni a, mipui hnenah a vaiin heng chhiahte hi a lêt leh vek dawn a ni," a ti a; mi ṭhenkhatin nawrh an huaihawt chu thil ngaihtuah chian loh vang nia a lan thu a sawi.