Larsap hoin Vairengteah Bharat Ko Jano

Mizoram Art & Culture department leh North East Zone Cultural Centre (NEZCC) ṭang dun chuan nimin khan Vairengte Joint YMA Playground-ah India rama hnam hrang hrangte inpumkhatna leh hnam ziarâng inhriatpawh tawnna leh chawilarna 'Bharat Ko Jano' an buatsaih.

Sorkar laipuia Ministry of Culture hnuaia NEZCC bultuma buatsaih Bharat Ko Jano-ah hian Mizoram Governor Dr Hari Babu Kambhampati chu khuallian a ni a, Nagaland Governor La Ganesan, NEZCC chairman ni bawk chu khualzahawm a ni.

Dr Hari Babu Kambhampati chuan, NEZCC Chairman hmalaknaa Vairengtea Bharat Ko Jano hman a ni chu ṭha a tih thu a sawi a, "Ramri dep Vairengtea chengte hi remna leh muanna vawnnun kawnga mawhphurhna pawimawh tak nei an ni a, muanna, rinawmna leh mikhual chunga ṭhat chhuah kawngah Mizoram dinhmun chawi nungtute an ni," a ti.

India ram chanchin, mi dangte hnam ziarâng leh tih dante zira India ram hnam ziarâng hausakna ngaihlu thiam turin Hari Babu Kambhampati chuan kal khawmte a chah a, "India hmarchhakah ringawt pawh hnam péng hrang hrang 200 leh ṭawng hrang hrang 220 chuang a awm," a ti a; hnam ziarâng leh nunphungte inhriatpawh tawnna chu inpumkhatna tinghettu pawimawh a nih thu a sawi.

Nagaland Governor La Ganesan chuan, thawhhona ṭhain inlungrualna, theihna nasatzia leh hnam ziarâng hausakna a pho lang ṭhin tih a sawi a, "Hmarchhak hi India tana chêt lak vel nana hmun pawimawh tak a nih bakah, India ram hnam ziaráng hrang hrang awmna leh India chanchina thil pawimawh tam tak thlenna leh awmna hmun a ni," a ti.

Bharat Ko Jano-ah hian NEZCC director Dr Prashanna Gogoi-in inlawmna thu a sawi a; Mizoram, Assam, Tripura leh Bihar aṭangin lâm thiamte'n hnam lâm chi hrang hrang an entir a ni.