Karnataka-ah LRS Minister inzir dawn

Land Revenue & Settlement (LRS) minister B Lalchhanzova chuan October 22, Thawhlehni khan Karnataka state sorkara Revenue depart­ment kalphung zir chiang turin Bengaluru a thleng a; Karnataka Revenue minister Krishna Byre Gowda kâwmin, state pahnih inlaichìnna tichak tura thawhpuiah a sáwm.

Sorkar thuchhuah tarlan danin, B Lalchhan­zova hian Karnataka state chu India ram state zinga land revenue administration nei ṭha leh technology thar hmang ṭangkai ber zinga mi a nih avanga tlawh a nih thu Krishna Byre Gowda a hrilh a; Karnataka khawpui Bengaluru-ah Mizo ṭhahnem tak an awm thu sawiin, a ṭul anga an thlavâng lo hauh ṭhin turin a ngen.

B Lalchhanzova chuan, "Mizoram LRS department-a thawktute'n theihtawp chhuah ṭhin mah se, kan set-up leh kalphunga fuh tâwk lo laite siamṭhat zel a ṭul a, India rama he lama hmahruaitu Karnataka state hi tlawh a pawimawh a, thil ṭha tam tak kan zir chhuah theih ka beisei a ni," a ti.

LRS Minister hian October 26, 2024 thleng Karnataka sorkar hnuaia Revenue department kalphung leh tih dan ṭhate a zir dawn a; LRS secretary Vanlalmawia leh sorkar official dangte'n an ṭawiawm a ni.