High Field-a khelmual siam December 2024-ah zawh tum

Mizoram State Project Monitoring Committee (MSPMC) chuan nimin khan High School Field, MacDonald Hill, Zarkawta Multipurpose Ground siam mek an enfiah. Khelmual siam hna hi Lushai Engineers-in an thawk a, a zatve (50%) vel zo tawhin, December 2024-ah zawh hman an tum.

Sorkar thuchhuah tarlan danin, High School Field-a Multipurpose Ground siam mek hi Aizawl Smart City Ltd. hnuaia siam a ni a; February 4, 2023-ah hna thawh ṭan niin, thla 18 chhunga zawh tura tih a ni. Harsatna hrang hrang avangin hna thawh zawh hun tura bitukah zawh a ni lo a, December 2024-ah zawh an tum. Hna thawhna atana a tira sum ruahman chu nuai 1,627.71 a ni.

Endiknaah hian MSPMC team hi secretary Lalthanzuala Ralte hoin an kal a; member pali - Prof. Chawngsailova, Sanghrima Chongthu, Lalrinawma leh Vanchhungi an tel. Aizawl Smart City chief executive officer CC Lalchuangkima, deputy CEO V Lalruatliana, executive engineer Lalrosiama leh assistant engineer Kennedy Vanlalnunmawia te pawh an tel a; Lushai Engineers aiawhin Lalbiaksanga, Lalhmachhuana leh engineer dangte an tel bawk.