Mipuiin politics an ngaihven a pawimawh - Lalthansanga

Minister Lal-than­sanga chuan, politics chu mahni inhaivûrna ni loin, mi dang tana malsawmna nihna hmanrua a nih thu sawiin, mipuiin politics an ngaihven a pawi­mawh thu a sawi.

Lalthansanga hian Sinlung Hills Council inthlan tur atan campaign-in nimin khan Zohmun, Mauchâr, Palsáng leh North Ṭinghmun khuaahte thu sawiin, "Ram siamṭhat kan duh a, kan tu leh fate hmakhua zel kan ngaih­tuah chuan politics hi kan ngaihven a ngai. Politics hi mahni inhai­vûrna ni loin, mi dang tana malsawmna ni tura hmanraw pawi­mawh tak a ni," a ti.

Mizoram dinhmun thlirin, Mizoram lo hruai tawhte'n an hruai danah duhkhawp hmu lo an awm thei tih sawiin Lalthansanga chuan, "ZPM party nau­pang takah rinna leh beiseina sang tak nei­in rorelna kan kutah an hlan a, chu chu hriain theihtawp kan chhuah tak meuh a ni," a ti a; tih sual palh an nei a nih chuan ngaih­dam dil ngam tur leh tlâwm ngam tura huai­sen a ṭul thu a sawi.

Lalthansanga chuan, ram hruaitu hmasate'n thil ṭha tam tak, ram leh hnam ro tling eng emaw zat an hnutchhiah tawh tih sawiin, "Kan hruaitu hmasate hnung zui leh an hmachhawpte chhunzawm zel hi kan mawhphurhna a ni," a ti bawk.