Kawng leh sikul siam nan mipui chhiah pek kan hmang ve ngai lo - Dr Thangtea

MNF senior vice president Dr R Lalthangliana chuan Sinlung Hills Council inthlan atan campaign-in nimin khan Khawlian, NE Tlangnuam, Daido leh Phuaibuang khuate a tlawh a; MNF-in kawng leh sikul siamṭhatna atan mipui chhiah pek an hmang ve ngai lo niin a sawi.

Dr R Lalthangliana chuan, "ZPM hoin oil man an tihpun chhan kawng siam nan leh sikul siamṭhat nan hmang tur anga an insawi ṭhin hi MNF hun laiin kan tih ve ngai lo a, mipui chhiah pek tlingkhawm aṭangin kan hman ve ngai lo. Kawng leh sikul siamṭhatna tur chuan central aṭangin sum kan pawt chhuak ṭhin," a ti.

ZPM hotute thusawi chu a thu ringawtin a ṭha ṭhin a, a taka nunpui an nei leh si lo nia sawiin R Lalthangliana chuan, "Thu ṭha sawi ringawt ai chuan a taka nunpui leh thil ṭha tih a hun tawh a, thla 10 hmel an sorkarah hian thil ṭha an tih sawi tur mumal a la awm lo," a ti a; ZPM sorkar chu tawnhriat nei lo an nih avangin an arkhawthimdai mai mai niin a sawi.

MNF Senior Vice President chuan, Handholding Policy chu a tak ram a thleng tak tak thei dawn lo nia sawiin, tihpuitlin tak tak theih a nih a rin loh thu a sawi a; ZPM sorkar chu an sawi loh ang hlirin an kal nia sawiin, "An chêt dan hi 'Tlawng vuaka Mat dap' an sawi ang vel chauh a ni," a ti.