SHC inthlanah maxicab 20 hmang dawn; Khawtual mite duhsak an ni - Saitual DC

Saitual district bawrhsap Dr Lalngura Tlau kaihhruaiin nimin khan sorkar hotute leh lirthei pawl hruaitute'n November 5, 2024-a Sinlung Hills Council inthlanpui awm tura lirthei hman chungchang an sawiho. Bawrhsap chuan, State Election Commission hnuaia inthlang tur an nih avangin khawtual mite duhsak an nih thu a sawi.

Ṭhutkhawmah hian SHC inthlanpui awm turah maxicab-te chu ni 30 leh a aia rei emaw hman a nihin ni khatah Rs 4,000 zel hisâpa hman turin an rêl a; Saitual khawpui páwnah km. 1 zelah Rs 40-in an tlan dawn a, hei hian kal lam leh haw lam a huam ang.

Lirthei khalhtute chu an tûkṭhuan, chawchhun leh zanriahte tumsak an ni ang a, preciding officer-te'n an buaipui dawn a ni. Maxicab 20 hman tum a ni a, November 4, 2024-ah polling station panin an chhuak ang. Inthlan zana zanlai pelh hnu lama thleng, a tûka service/tlan hman tawh lo tan Rs 3,000 pek tur a ni.

Lirthei hman turte chuan document felfai an neih a ngaih bakah, a khalhtute pawhin driving license nung (valid) an nei tur a ni a; lirthei khalhtute'n rûi chungin an khalh tur a ni lo.