Bána Kaih scheme hnuaia thlai hralh leh lei kalpui dan tur zirho

District Agricultural Marketing Committee (DAMC) huaihawtin nimin khan Lunglei DC conference hall-ah leh Lawngtlaiah Bána Kaih (Handholding) Scheme hnuaia thlai zawrh, hralh leh lei kalpui dan tur zirhona, buatsaih a ni.

Lungleia ṭhutkhawm kaihruaitu DAMC chairman R Lalṭhazuala, bawrhsap chuan, Bana Kaih scheme chu Mizoram sorkar ruahmanna pawimawh a nih angin hlawhtling taka kalpui a nih theih nan ngaihtuahna sêng tlâng turin kalkhawmte a chah a, "Kut hnathawktute leh hma thar latute bana kaih bakah, an mamawh anga kaihhruaina pek leh thlai thar hralhna ngaihtuahpui kawngahte mahni zawnah ṭheuh theihtawp chhuah ang u," a ti.

Ṭhutkhawmah hian Mizoram Agriculture Marketing Board member te, district office hrang hrang official-te leh State Bank of India, Mizoram Cooperative Apex Bank leh Mizoram Rural Bank aiawhte an tel a; BDO-te leh line department hrang hranga block office-te'n online-in an chhim a ni.

MAMB member Dr Robert Lalrinsanga, Horticulture deputy director-in Bana Kaih scheme hnuaia thlai chi li - sawhthing, aieng, hmarcha leh hmunphiah lei leh hralh (market) kalpui dan tur ruahmanna a sawifiah a; MAMB co-opted member Daniel Lalawmpuia, DAMC member-in thlai thar lei leh hralh chungchanga hriat tur pawimawhte a tarlan bakah, sawihona leh zawhna leh chhana hunte hman a ni.

Lawngtlai DAMC pawh MAMB member-te nen additional DC Zoramsiama Hmar kaihhruaiin an ṭhukhawm a; Lawngtlai West bialtu MLA C Ngunlianchunga'n a telpui.

Ṭhutkhawmah hian thlai thar hralh dan tur kaihhruaina te, thlai chíngtute aṭanga a leitute hnen a thlen dan tur te, lak khawmna hmun aṭanga hralh dan turte sawiho a ni a; DAMC mawhphurhna hrang hrang leh tih tur hmasate tarlan a nih bakah, sawihona leh zawhna leh chhanna hun hman a ni.