KHAWTHLIR

Mei zu mi 5 man

Aizawl District Anti Tobacco Squad chuan nimin khan Secretariat building-ah phal lohna hmuna mei zu an awm leh awm loh an endik a, danin a phal lohna hmuna mei zu mi panga an man a, pawisa an chawitir. Tobacco Free Youth Campaign 2.0 pualin phal lohna hmuna mei zu an awm leh awm loh ngawrh lehzuala endik tum a nih thu an sawi.

SHC strong room

Aizawl district election officer Lalhriatpuia chuan State Election Commission phalnain Sinlung Hills Council inthlanpui atan Darlawn BDO quarters basement leh Aizawl DC office-te chu vote tlate dah khawmna hmun, strong room atan a puang.

Dragon fruit zirho

Hnahthiala Krishi Vigyan Kendra (KVK) chuan nimin khan Hnahthial, South Vanlaiphai, Darzo leh Pangzawl khuaa self help group aiawh mi 15 tan ‘Post Harvest Management and Value addition of Dragon fruit’ tih thupui hmangin dragon fruit chungchang inzirtirna an buatsaih. KVK scientist Dr Henry Saplalrinliana leh subject matter specialist Zonunkimi Ralte ten thil pawimawhte an zirtir a ni.

Faina intihsiak

Lawngtlai additional DC Zoramsiama Hmar kaihhruaiin nimin khan DC conference hall-ah UDPA department bultumin sorkar hotu te, kohhran leh khawtlang hruaitute'n 'Mizoram Cleanliness Competition 2024' puala hmalak dan tur an rêl. Lawngtlai district-a village council, kohhran leh tlawmngai pawlte nen thawhhona ṭha tak neih ni se, an ti.

Mimal enkawl ATM

Nimin khan New Champhaia HT Khupa building-ah Champhai additional DC K Zorammuana'n Vakrangee Kendra ATM booth a hawng a; Mizorama mimal enkawl ATM booth pahnihna a ni. Tarlan danin, Mizoramah Vakrangee Kendra ATM booth 30 vel hawn theih beisei a ni a, booking 11 a awm tawh. October 2024 chhungin Aizawl leh Lungleiah hawn leh tum a ni.