Minister-in chaw nghei titawp turin ngen Chaw ngheiten tihtawp la tum lo

School Education minister H Rohluna leh director K Lal­thawm­mawia te chuan nimin khan RMSA-a an hna ngai thawhtir leh phûta chaw nghei mekte tlawhin, an nawrh titawp turin an ngen. Hunger strike nei mekte erawh chuan thu lawmawm an dawn loh avangin chaw nghei tihtawp an la tum lo thung.

PRISM office-a chaw nghei mekte an tlawh chungchanga Vanglaini palai zawhna chhang­in, minister H Rohluna chuan, chaw nghei titawp turin an ngen a, an thil phût chu Mizoram sorkar sum ringawt hmang chuan tihhlawhtlin theih a nih loh thu an hrilh nawn niin a sawi.

RMSA-a thawk bàn takte rawih an nih leh theihna tura Central-a an nawr zui dan zawhna chhangin H Rohluna chuan, PAB-ah nasa taka an nawr tawh bakah, MHRD minister-ah pawh lehkha a ziak tawh tih a sawi a, "Sum pek belh tura ngenna lehkha MHRD minister-ah ka ziak tawh a, parliamentary secretary-in Central sorkar official-te nasa takin a dawr kual tawh bawk a ni," a ti.

School Education minister chuan, RMSA-a thawkte bân an nih lohna tura sum pek belh tura an ngenna chu MHRD official-te chuan, ram pumah budget a tlakhniam avangin an tih theih loh thuin an chhang niin a sawi a; chutiang tho chuan MHRD Minister pawhin a chháng tih a sawi.

Hetih lai hian, RMSA hnuaia laboratory attendant leh clerk, chaw nghei mekte chuan thuchhuah siamin, School Education Minister leh officer-te chuan chaw nghei titawp turin an ngen tih an tarlang a, "Central-ah beih zui leh chu an tih tur a nih thu leh state sorkar sum indaih lohna a nasat avangin state-in a chhawr chhunzawm theih loh thu min hrilh a ni," an ti.

School Education Minister aṭangin thu lawmawm an dawn loh avang leh state sorkarin anmahni a ngaihthah nia an hriat avangin chaw nghei chu chhunzawm zel an tum thu an puang a ni.

RMSA-a thawk ṭhin sorkarin a bân takte hian April 27, 2015 aṭangin chaw an nghei ṭan a, an zinga ṭhenkhat chu an chau tawh hle a, doctor-te'n vil reng mah se, nimin tlai thleng khan mi 18 chu damdawi-inah an hruai an ni tawh.